O piloto ileso do accidente no que morreu unha moza en Touro dá positivo

O condutor do coche que na madrugada deste domingo sufriu un accidente en Touro (A Coruña), no que faleceu unha moza de 20 anos, arroxou unha taxa positiva no test de alcoholemia realizado polos axentes de Tráfico, segundo informan fontes da Garda Civil.

Imaxe da CRTVG

O sinistro, indica o 112, ocorreu sobre as 3,30 horas. Sobre esa hora, a central de emerxencias recibiu a chamada dun particular que avisaba dun accidente á altura da discoteca Doa Dana.

O alertante indicaba que o coche estaba envorcado na cuneta e que puideran sacar a unha muller ferida. Durante a mesma chamada, outro particular comunicaba á central de emerxencias que había no interior outra persoa inconsciente e atrapada no coche.

Así, o 112 deu o aviso a Urxencias Sanitarias-061, á Garda Civil de Tráfico e aos bombeiros de Arzúa. Os membros de Protección Civil foron informados do sinistro.

Foi necesaria a intervención dos bombeiros de Arzúa para rescatar á vítima mortal, unha moza de 20 anos que quedou atrapada no interior do vehículo.

A outra moza, de 22 anos, resultou ferida e foi evacuada ao Hospital Clínico de Santiago, segundo indica o 061. O condutor do coche, que deu positivo en alcoholemia, resultou ileso.