O bo tempo acompaña á vendima na D.Ou. Rías Baixas, con 34 millóns de kg recollidos no seu ecuador
178 adegas participan na campaña de recollida, para a que se estima unha cifra próxima aos 42 millóns de quilos para esta tempada.
178 adegas participan na campaña de recollida, para a que se estima unha cifra próxima aos 42 millóns de quilos para esta tempada.
Nun ano "cálido e seco" para a colleita, a uva dispón dunha calidade e un estado sanitario "perfecto", axudado xusto pola calor e as choivas dos últimos días.
É tempo de vendima. A calor está a acompañar aos xornaleiros que, despois das copiosas choivas que tiveron lugar a inicios da pasada semana, están a recoller xa as uvas para unha colleita exemplar na Denominación de Orixe Rías Baixas. Así o celebran desde a propia organización, que se atopa “no ecuador” dos traballos de recollida con todas as adegas traballando a pleno rendemento.
O director técnico do Consello Regulador, Agustín Lago, admite que os labores comezaron “mirando ao ceo”, pero que esta fin de semana abriuse de verdade a veda. “De momento recolléronse máis de 34 millóns de quilos de uva”, festexa, cunha estimación que roldará os 42 millóns de quilos. Isto nas brancas, que son a estrela das Rías Baixas, xa que das tintas apenas se recolleron 45.000 quilos.
En plena faena atópase tamén os 23 auditores que controlan a orixe e a calidade da uva das 178 adegas integradas nesta campaña. Como ocorreu noutras D. Ou. consultadas por Galiciapress, a calor do verán evitou pragas que danasen a uva, o que facilitou que nesta ocasión dispoñan de “un perfecto estado sanitario e un bo nivel de calidade”.
UN ANO “CÁLIDO E SECO”
A vendima prolongarase aínda uns días e será especialmente tardío o seu final, especialmente se o comparamos con outras zonas como Valdeorras, onde algúns produtores iniciaron a recollida a finais de agosto.
“O ciclo vitícola na campaña 2022 estivo caracterizado por un inverno moi cálido e seco; tamén por unha primavera moi cálida e moi seca. O mes de xuño foi normal e húmido, aínda que cunha gran variabilidade; e o verán, en xeral, foi moi seco, con ausencia de precipitacións”, sinalan desde Rías Baixas, onde teñen que peitear máis de 4.300 hectáreas para un ano que promete ser de auténtico luxo.
Escribe o teu comentario