Miles de coruñeses celebran o ascenso do Depor tras oito tempadas fóra de Primeira División

As rúas da Coruña enchéronse este domingo de miles de afeccionados que celebran o ascenso do Deportivo tras oito tempadas fóra de Primeira División. Un fito que fixo "tremer" Riazor, segundo indican os propios deportivistas.

E é que o equipo da cidade herculina viviu o seu último descenso da máxima categoría ao finalizar a campaña 2017-2018. Desde entón, loitou por regresar a primeira, pasando por momentos nos que mesmo descendeu a Segunda División B, agora Primeira RFEF.

Este domingo, o Depor conseguiu o seu obxectivo tras bater contra o Real Valladolid Club de Fútbol, no Estadio José Zorrilla, e anotar dous goles. O asubío final do partido causou un tsunami de deportivistas que se botaron ás rúas a celebrar a vitoria.

A fan zone colocada á beira do Estadio Abanca Riazor foi o epicentro das celebracións, nas que se reuniron miles de persoas de todas as idades. Ademais, alí estaba colocada unha pantalla desde a que se retransmitiu o partido, polo que os afeccionados puideron vivir a experiencia en directo.

En coches, na praia, e ondeando as bandeiras, até María Pita engalanouse coa camiseta branquiazul nunha xornada que se encheu de música, berros e asubíos para celebrar o regreso do Depor.