O Racing de Ferrol destitúe a Cristóbal Parralo, o home que devolveu a cidade a Segunda División

Punto e final á historia de amor de Cristóbal Parralo e o Racing de Ferrol. O preparador, inquilino do banco da Malata desde 2021, acaba de ser destituído pola dirección racinguista despois do desastroso 6-0 que recibiu o equipo na súa visita ao Sardinero ante un Racing de Santander que vapuleó ao cadro da cidade naval, que agora busca un novo técnico que guíe ao equipo á permanencia.

O HOME QUE CAPITANEOU O REGRESO Ao PROFESIONALISMO

Parralo chegou á cidade departamental en febreiro de 2021 e desde a súa chegada a melloría do Racing foi constante. A ilusión por devolver aos ferroláns ao fútbol profesional recuperouse con Parralo á fronte dun conxunto que se coou no playoff de ascenso no seu primeiro curso e que logrou a fazaña en 2023 ao gañar a liga, superando a outros grandes de Primeira RFEF como Deportivo da Coruña, Alcorcón ou Real Madrid Castela. 

O fito de devolver ao Racing a Segunda 16 anos despois só puido ser superado pola brillante campaña dos verdes no seu resgreso á división de Prata, cunha primeira volta sensacional pola que pelexou, mesmo, polo liderado de Segunda, sendo un dos grandes axitadores do campionato e batallando até o final por un posto nos playoff.

No entanto, e despois dun ano tan bo, nesta segunda experiencia en Segunda o Racing non deu o nivel esperado, sobre todo no apartado ofensivo, sendo con 14 tantos o equipo con peor bagaxe neste capítulo. A goleada en Santander supón a puntilla a un cuestionado Parralo que non soubo alcanzar a velocidade de cruceiro que si mantivo o ano pasado. 

Máis dun mes sen gañar e con tres partidos seguidos sen ver porta, Parralo deixa o club en vixésima posición, con 19 puntos, a oito da permanencia e só catro por encima do faroliño vermello. Ademais de acudir ao mercado en busca dun adestrador, é moi posible que o Racing persiga a contratación dun novo artilleiro que anote os goles que non chegaron esta tempada.

O Racing anunciou a súa destitución nun comunicado no que mostraron o seu agradecemento ao "traballo e compromiso durante estes catro anos nos que foi unha peza fundamental na chegada do club ao fútbol profesional". "Desexámoslle o mellor nos seus futuros proxectos, conscientes do seu valía persoal e profesional", engade a dirección ferrolá, que anunciará nos próximos días ao substituto de Parralo, mentres Javier Manjarín, segundo do xa exentrenador, dirixirá os adestramentos ata que se coñeza ao novo míster racinguista.