830 quilos de produtos para a beneficencia grazas ao 'alley oop' entre o Obradoiro e Gadis

O partido solidario do pasado 29 de decembro permitiu recompilar esta gran cantidade de axuda que irá destinada ao Albergue Xoán XXIII da capital galega.

A colaboración da cadea de supermercados e o club de baloncesto compostelán foi decisiva nesta e outras iniciativas solidarias. 

O Monbus Obradoiro e Supermercados Gadis entregaron ao Albergue Xoán XXIII de Santiago un total de 830 quilos de alimentos non perecedoiros e produtos de hixiene grazas aos puntos anotados no Partido Solidario disputado o pasado 29 de decembro ante o UCAM Murcia.

Ao acto de entrega, do que informou o Obradoiro nun comunicado, acudiron o director do Centro Cultural Social Xoán XXIII; Frei Miguel de Mátaa; o delegado do Grupo Gadisa na área de Santiago, Román Roo; o conselleiro do Monbus Obradoiro, Rafa Silva; o responsable de mercadotecnia do club; Andrés García Bustelo, e os xogadores Álex Suárez e Sergi Huguet.

"Para nós é unha tradición en Nadal facer o partido solidario para o Albergue Xoán XXIII e así axudarlles coa carga que teñen tanto de traballo como de produtos", explicou Román Roo, que destacou que se doaron cinco quilos de produtos por cada punto anotado.

Pola súa banda, Rafa Silva subliñou o compromiso da institución co Albergue: "Como club santiagués implicado na cidade, Monbus Obradoiro non pode estar alleo. Colaborar por décimo primeiro ano co Albergue Xoán XXIII, é case unha obrigación. Estamos encantados de participar nunha acción solidaria para axudar aos másnecesitados", dixo.

Ademais, puxo en valor o esforzo que fai o Obra a pesar da "falta de apoio económico público": "Monbus Obradoiro é un milagre ano tras ano na liga Endesa. É o campión dos equipos que menos axudas institucionais recibe", afirmou.

Pola súa banda, Frei Miguel de Mátaa, mostrouse encantado por recibir, un ano máis, a axuda de ambas as entidades: "Agradezo tanto a Gadis como a Monbus Obradoiro esta dispoñibilidade de cada ano, para gañarlle o partido á pobreza e á marxinación", destacou.

Así, sostivo que esta axuda lles vén "estupendamente" xa que "a demanda crece ano a ano". "Así podemos prestarlles un servizo máis completo aos nosos usuarios. Creo que é moi importante porque xera unha sensibilidade á que toda a sociedade compostelá ten que estar atenta", sostivo.