Lucas Vázquez engorda a enfermaría do Madrid e queda sen Supercopa

Courtois, Militao ou Encomia teñen un novo compañeiro na enfermaría do Real Madrid: Lucas Vázquez. O de Curtis é o último en sumar a unha longa lista de lesionados na escudra branca, que cada vez ten máis complicado completar as convocatorias con xogadores sans. A baixa do galego é especialmente sensible neste tramo de tempada, onde os partidos se acumulan e o Madrid xogarase o primeiro título da tempada. 

"Tras as probas realizadas hoxe ao noso xogador Lucas Vázquez polos Servizos Médicos do Real Madrid diagnosticóuselle unha lesión no músculo semitendinoso da coxa dereita. Pendente de evolución", refire o parte do conxunto merengue, que perde así a un futbolista que foi capital a final de 2023, cando callou un decembro redondo que completou cun croque sobre a bucina contra o Alavés para dar os tres puntos aos da capital. 

A baixa de Lucas, que baixo as ordenes de Ancelotti actuou en case calquera demarcación do campo, supón perder efectivos non só para a visita do Real Madrid a Miranda do Ebro con motivo da Copa do Rei, senón que tampouco viaxará a Riad para a expedición viquinga a Arabia Saudita, onde a semana que veñen xogarán as semifinais da Supercopa de España ante o Atlético de Madrid. Non se espera o concurso do galego até finais de xaneiro.