Todo listo para o 45 Rally San Froilán, estes son os seus tramos e horarios
A carreira, organizada pola Escuadra Miño, terá cinco tramos cronometrados en Outeiro de Rei -dous, un en Bonxe e outro en Guillar-, O Corgo, Láncara e entre O Páramo e Goián (Sarria). Disputarase o venres 20 de outubro pola tarde e durante todo o sábado 21 de outubro.
A subdelegada do Goberno en Lugo, Isabel Rodríguez, animou aos asistentes ao Rally San Froilán a "gozar" da 45 edición da proba "seguindo as normas" para o bo funcionamento da proba, que se celebrará os días 20, 21 e 22 de outubro.
Nesta liña, insistiu en que "teñan unha conduta exemplar para que a actividade poida seguir desenvolver de forma axeitada" como nos últimos anos, "seguindo en todo momento as ordes e normas de seguridade".
Expresábase así tras presidir este luns a Xunta Local de Seguridade do Rally na Subdelegación do Goberno en Lugo. Á reunión tamén asistiron representantes dos municipios por onde pasa o rally, responsables da Escuadra Miño, organizadora da proba; así como da Garda Civil, Subsector de Tráfico, Policía Local, Policía Nacional, Xefatura provincial de Tráfico, Bombeiros, Protección Civil do Concello de Lugo e Xunta de Galicia.
Durante a reunión, a subdelegada fixo un seguimento en canto a protocolos e controis en caso de accidente e evacuación e ratificou o apoio á cita.
A subdelegada do Goberno incidiu en que o público que asista á proba "cumpra coas normativas de seguridade, manter nos espazos dispoñibles para iso".
Con máis de 36 escuadras e 143 pilotos, este ano o rally percorre os municipios de Lugo, Outeiro de Rei, Corgo, Láncara, O Páramo e Sarria. Entregaranse un total de 46 trofeos.
Escribe o teu comentario