A eterna mocidade do galego Dani Rodríguez, insignia do EuroMallorca?

Autor dun dobrete ante o Vilarreal, o futbolista galego mantense como peza fundamental do Mallorca de Javier Aguirre. 

Protagonizando unha gran segunda volta, o conxunto mallorquinista ten como obxectivo pelexar por un billete para disputar competición europea o ano que vén. 

Con 34 anos -35 velas soprará en xuño-, moitos estarían tentados de pensar que ao galego Dani Rodríguez non quedan máis que breves escintileos nas súas machucadas botas. Con todo, o de Betanzos demostra xornada si xornada tamén que o seu talento é inesgotable, boa proba diso é a exhibición que deu o pasado fin de semana ante o Vilarreal na goleada do Mallorca por 4-2, onde anotou a metade dos tantos locais. Os pupilos de Javier Aguirre miran de fronte a Europa e, co ritmo que veñen marcando nas últimas xornadas, poderían asaltar pronto a praza que hoxe ocupa o Raio Vallecano.

O bo momento dos baleares coincide no tempo cun Dani Rodríguez en plenitude. Os inicios este curso non foron sinxelos. Aínda que arrincou como titular, o canteirán do Dépor pareceu perder a condición de indiscutible mediada a primeira volta. Non foi até novembro que regresou ao once do técnico mexicano, que desde entón lle deu a batuta do equipo, responsabilidade coa que o galego cumpriu con fartura. 

Na illa desde 2018, Rodríguez viviu noites máxicas en Son Moix, como o ascenso remontando en playoff ante o Dépor ou o segundo posto da 20/21, pero tamén momentos difíciles como o descenso ou a loita pola permanencia do pasado curso. Agora, tanto o galego como todo o equipo insular viven un momento doce e mesmo poderían chegar a xogar en Europa, un gran broche para un futbolista que pasou por todas as categorías do fútbol nacional. 

Agora é momento de recoller o sementado para un futbolista que, ademais, é xa lenda do Mallorca ao converter no cuarto máximo asistente dun club no que será centenario en Primeira esta mesma tempada. Este fin de semana celebrou dous goles, e xa van 50 desde que chegou ao fútbol profesional. A tempada que vén podería cantalos por toda Europa. Dani ten corda para longo.