Joselu regresa ao Lugo para ampliar a súa lenda e ser o seu máximo goleador: "Quédame guerra por dar"

O atacante andaluz pechou onte a súa contratación polos lucenses, na que será a súa terceira etapa no Anxo Carro, agora xa como futbolista en propiedade dos albivermellos. 

Joselu poderá seguir sumando no apartado goleador, onde é aínda o máximo artilleiro dos lucenses, empatado con Herrera. Un só gol converterao no mellor artilleiro do Lugo en Segunda. 

A de Joselu e o #CD Lugo é unha desas historias de amor que veñen e van, pero que sempre teñen o mesmo destino: os dous xuntos. O de Cartaya é todo un talismán do cadro albivermello, cunha dilatada carreira en Segunda, onde sempre fixo goles, especialmente no Anxo Carro. Con todo, a súa traxectoria levouno lonxe da cidade amurallada, á que volveu cedido o curso pasado para relanzar a súa carreira e na que este xaneiro, na que será a súa terceira etapa en Lugo, firma para seguir sumando para a salvación e escribir outro capítulo na súa lenda.

Os de Fran Xusto perseguían a súa contratación desde hai semanas. Joselu levaba un tempo a proba no club, como Pantic, pero non puido ser até este xaneiro que o Lugo puido inscribilos a ambos. Joselu é, xunto a Cristian Herrera, o máximo anotador do Lugo en Segunda División, con 33 festexos. Manu Barreiro necesita tres goles para superar esa marca, pero agora Joselu aspira a quedar só nesta histórica conta. 

Con Chris Ramos como nove de referencia, Joselu terá que pelexar por un posto no once ou que Xusto valore un esquema con dous arietes. Ninguén dúbida do seu talento, pero a inactividade e as lesións poden deixalo nun segundo plano, polo menos durante as primeiras semanas. 

"UN CARÁCTER GAÑADOR"

"Joselu ten un perfil diferente de mobilidade, de área, de traballo e agresividade na presión. Achegará cousas diferentes, subimos o nivel competitivo, e achegaranos cousas diferentes. Ten un gran carácter gañador", valoraba Pita, o director deportivo, na posta de longo do dianteiro, onde tamén abriu a porta a novas incorporacións dependentes das saídas.

Joselu, pola súa banda, mostrouse ilusionado nesta nova etapa. "Decidín apostar polo CD Lugo, e non escoitar as ofertas que chegaran. É verdade que a recuperación foi dura, pero atópome activo, quero recuperar o ritmo e o nivel", afirmou ante a prensa. Na mesma liña, tratou de despexar calquera tipo de sospeita: "Vou traballar moitísimo, a esixir aos compañeiros ao máximo. Se non me vise ben, iríame, pero sei que me queda moita guerra por dar aínda".