Abraham Mateo confirma a súa presenza nos concertos de Castrelos o día 7 de agosto
O artista únese a Viva Suecia, Chayanne ou Deep Purple no ciclo de concertos de Vigo.
Xa hai plan en Vigo o próximo 7 de agosto. Aos poucos o ciclo de concertos que organiza o Concello de Vigo no auditorio ao aire libre de Castrelos vaise enchendo de datas, a última co concerto confirmado de Abraham Mateo para o oitavo mes do ano.
PLANS DE VERÁN
Abel Caballero, como vén sendo habtiual, foi o encargado de anunciar a actuación a través das súas redes sociais cun vídeo co que presentou a iniciativa. "É un dos mellores artistas de pop urbano do momento", declara o mandatario sobre esta aposta por Mateo.
Non será, no entanto, o único plan do día na cidade olívica, pois o concerto coincidirá cunha nova edición do festival Ou Marisquiño, que terá lugar do 6 ao 9 de agosto e que volverá encher Vigo de festivaleros, turistas e curiosos cunha ampla porgramación.
O de Abraham Mateo é o último nome do goteo de concertos confirmados en Castrelos, arrincando o 2 de xullo -polo menos de momento- con Deep Purple. A Coral Casabranca, a Ópera Carmen e o concerto de Chayanne son as outras datas confirmadas en xullo, concretamente os días 18, 24 e 30.
Agosto arrinca o día 1 cunha Noite de Zarzuela e ten a súa continuidade o 9 coa Ópera Nabucco. The Corrs o 11 de agosto, Viva Suecia o 14 de agosto e Iván Ferreiro o 15 de agosto son os outros concertos confirmados até o momento en Castrelos.
Escribe o teu comentario