Familia Caamagno reúne aos seus incondicionais na Sala Capitol para a estrea de 'Disco Comarcal'

Cumprir tres lustros sobre os escenarios son motivo de celebración máis que suficiente como para convocar a propios e estraños a unha gran festa. Así o farán este venres os integrantes de Familia Caamagno, que se presentan na Sala Capitol cun disco debaixo do brazo para festexar estes 15 anos de música no que suporá o pistoletazo de saída aos directos de 'Disco Comarcal', o seu novo álbum.

GRAN ESTREA

O LP dos de Sigüeiro, o terceiro coa súa firma, xa está a soar en todas partes, con temas como 'Bomba de calor' que xa acumula miles de reproducións desde o seu lanzamento hai pouco máis de 15 días e que pon de manifesto que, máis dunha década despois, seguen sendo unha refencia na escena pop-rock do país. 

A esperada estrea en directo a través dos seus oito temas novos terá lugar en Santiago de Compostela este 6 de febreiro, na mítica Sala Capitol a partir das 21:30 horas, e acompañados de moito máis que os fieis "caamagners" nesta primeira pedra de toque para a que aínda quedan boletos dispoñibles.

E é que, para tan sinalada ocasión, Familia Caamagno estará flanqueado por Ulex, a banda que fará de teloneira antes do gran concerto, e da Orquestra do Quince, formación de instrumentos de vento e teclados que prestarán apoio aos de Sigüeiro para pór a bailar a todo o recinto no que xa anuncian será "un directo novo e diferente" que contará, ademais, cunha sesión golfa na Sala Riquela cunha sesión de 'Pídechas ou corpo' para que siga a festa nunha noite que promete ser memorable na capital galega.