Quen actuará na Festa do Queixo 2026? As peticións dos "queixeadores" van de Parquesvr a Iron Maiden

A LI Edición da Festa do Queixo de Arzúa xa está en marcha. Cumpridas as vodas de ouro, a celebración gastronómica, musical e cultural na Terra do Queixo suma e segue, perfilando unha nova cita con cinco días de celebración do 27 de febreiro ao 3 de marzo. Non faltará de nada para esta convocatoria que promete seguir rompendo rexistros e da que, de momento, a organización non quixo dar moitas pistas.

QUEN vén?

O anuncio das datas chegou en redes sociais e en folios colocados estratexicamente en distintos puntos da xeografía arzuá. O Concello leva meses traballando nesta nova edición e o seu alcalde, Xoán Xesús Carril, asinou o mes pasado un acordo coa Deputación dá Coruña para a colaboración das dúas entidades para o financiamento da cita. 

Unha cita para a que, até agora, non se destaparon moitos detalles. De momento, entre as moitas actividades que comprende a Festa do Queixo, só sabemos que o 21 de febreiro terá lugar a II Carreira Terra do Queixo despois da prometedora estrea do ano pasado. Desde a Igrexa de Santa María de Melide até a Capela da Mafanela en Arzúa os corredores tratarán de cubrir os máis de 13 quilómetros que separan a estes dous puntos que son patrimonio da comarca.

A pesar de todo, no que se concentran os esforzos os máis queseros é en coñecer, cando antes, os integrantes do cartel do Festival do Queixo, que o ano pasado contou con Xoel López, The Rapants, Mondra, Cariño ou Xisco Feijóo, entre outros reclamos musicais.

A música é un dos selos de identidade da festa e na súa conta de Instagram animaron aos "queixeadores" a propor algúns nomes que lles gustaría ver sobre o escenario de Arzúa. Nin curtos nin preguizosos, os seguidores reclamaron a bandas emerxentes, como Sanguijuelas do Guadiana, até grupos internacionais de lenda, como Iron Maiden. "Nunca deixedes de soñar", recoñecían os organizadores, deixando claro que aínda que a imaxinación do público non ten límites, a carpa de concertos si os ten. 

Un novo concerto dos rapantes, os irreverentes Parquesvr, as letras reivindicativas de Rebeliom do Inframundo, os ritmos latinos de Ca7riel e Paco Amoroso ou outro asalto de Capital Voskov, gañadores do último Queixo Maquetón, foron outras das peticións entre chamadas a artistas do país como Vimbio, Dakidarría, Ortiga, De Ninghures, Kike Varela ou Hugo GZ. 

Por agora, non soltan peza, pero animan a non perder de vista as redes sociais, pois máis pronto que tarde haberá noticias que deixarán, como non podía ser doutra forma, un gran sabor de boca.