O Festival 17º Ribeira Sacra confirma a The Jayhawks, Anxo Stanich, Exsonvaldes ou Wings of Desire para 2025
O evento, que xa confirmara a Julieta Venegas, revela algunhas das bandas que compoñen o seu cartel.
Julieta Venegas non estará soa na Ribeira Sacra este verán. A artista mexicana foi o primeiro nome descuberto pola organización do Festival 17º Ribeira Sacra, que regresa a este magico enclave para celebrar tres días de música do 18 ao 20 de xullo. Pouco se sabía até hoxe desta singular cita, que deu a coñecer algúns dos artistas que darán a nota en escenarios tan pintorescos como un catamarán ou unha adega.
MÚSICA, GASTRONOMÍA, PATRIMONIO...
Para esta nova edición, o festival volve apostar por bandas internacionais da talla dos estadounidenses The Jayhawks co seu estilo country alternativo, flanqueados polos franceses Exsonvaldes ou os británicos Wings of Desire. Laverca Bentley e Cosmic Wacho son outros dos nomes propios do festival.
Con todo, non só actuarán formacións de territorios de ultramar, senón que os artistas nacionais tamén teñen cabida neste ciclo de concertos, co aclamado Anxo Stanich capitaneando as voces do país, pero coa incógnita aínda de quen protagonizará o 'Concerto Sorpresa Momentos Alhambra', talvez un dos eventos máis esperados cun catamarán como escenario e o fermoso percorrido polos canóns do río Sil como pano de fondo.
Os galegos Anxo Araújo, Allova e Néstor Pardo completan, de momento, este cartel, regado polos viños e as distintas propostas gastronómicas que sempre acompañan a este festival e que a organización aínda se garda baixo a manga, sabendo que a sorpresa é un dos seus éxitos despois de lograr consolidar no circuíto nacional e ser recoñecido por cuarto ano consecutivo na categoría de Best Small Festival nos Iberian Festival Awards.
Escribe o teu comentario