Galicia vive "unha emerxencia ligüística extrema" para A Mesa tras os últimos informes da lingua

Os datos publicados polo Instituto Galego de Estatística non deixan lugar a dúbidas: un terzo dos nenos saben "pouco ou nada" de galego e a maioría da poboación fala en castelán. 

Mentres a Xunta despexa balóns fora e fala da influencia dos migrantes, desde A Mesa pola Normalización Lingüística son tallantes ao considerar que existe "animadversión á lingua". 

O presidente da Mesa pola Normalización Lingüística, Marcos Maceira, cualificou de "desastre" a situación que mostran os datos publicados este venres polo Instituto Galego de Estatística (IGE) sobre o uso do galego e culpou directamente ao Decreto do Plurilingüismo da Xunta de Galicia. "Estamos en emerxencia lingüística extrema", asegurou.

Sobre isto, afirmou que se trata dunha política lingüística "contra o galego", xa que a lingua queda "excluída legalmente do 70% das materias impartidas" no ensino escolar -- o decreto marcaba a presenza de idiomas nun 33% cada un, castelán, galego e inglés --.
 

Para Maceira, esa é a "única explicación" de que, tal e como apuntan os datos, un terzo de nenos de máis de 5 anos saben falar "pouco ou nada" na lingua cooficial. "Son a consecuencia lóxica da exclusión do galego da maior parte dos ámbitos da vida social", lamentou.

As cifras derivan da actualización que realiza este 11 de outubro o instituto demoscópico do módulo específico de coñecemento e uso do galego da súa enquisa estrutural a fogares (unha información realizada a partir de case 10.000 enquisas).

En concreto, o estudo que publica o IGE certifica que son xa máis os cidadáns que residen en Galicia os que falan sempre en castelán --un 29,66%-- que os que utilizan a lingua cooficial no seu día a día de forma continua --24,37%--.

Así, no apartado relativo a saber falar o idioma, o 32,44% de nenos de entre 5 e 14 anos (o 32,44%) sabe falar "pouco ou nada" en galego. O contrapunto está nos maiores de 64 anos: un 16,6% recoñecen saber "pouco ou nada", pero máis do 50% afirma dominar o idioma moito.

"OU HAI ANIMADVERSIÓN Á LINGUA OU NON SE PODE ENTENDER"

Maceira referiuse ás declaracións de Valentín García nas que alegou que a chegada de poboación do exterior "inflúe directamente" no aumento de castellanohablantes e negou que isto sexa así.

Considera que se ese aumento se dese noutros segmentos de idade, como en maiores de 40 anos, por exemplo, podería utilizar como xustificación, pero insiste en que os peores datos rexístranse na poboación que "estudou con ese decreto".

Para o presidente da Mesa, os datos son "terroríficos", "un desastre". "Estamos en niveis de emerxencia lingüística extrema. A situación de descenso que se produce nos últimos cinco anos é terrible. E si non se toman medidas, a situación vai ser grave", advertiu.

"O triste", continuou, é que hai "posibilidades de reverter a situación". "Pódese facer se poñemos todas as políticas a disposición da lingua, co mínimo de garantir que hai posibilidade de uso en todos os ámbitos".

"Ou hai animadversión á lingua ou non se pode entender que eses dereitos non se poidan garantir", denunciou

Máis aló do problema na educación, Maceira puxo o foco noutros ámbitos como a administración ou a xustiza ou o tempo libre (0,4% nos xoguetes, 1% no audiovisual, ausente en actividades deportivas).

Por iso, expuxo as peticións da organización, entre as que está "avanzar" para que o galego sexa lingua vehicular, modificar as leis do poder xudicial para garantir que os procedementos poden levar a cabo en galego, eliminar os obstáculos á actividade en galego dos medios de comunicación; e garantir o uso da toponimia oficial, entre outras.

Así mesmo, lembrou que traballan para "reverter" a situación e, entre outras accións, informou de que este mesmo venres enviaron á Comisión de Dereitos Humanos da ONU un informe sobre a situación que se vive na educación, a xustiza e na administración, que se exporá o 30 de abril en Xenebra.

Por último, lamentou que o Conselleiro de Cultura e Política Lingüística, José López, non acepte reunir con eles tras dúas peticións formais.

A Xunta de Galicia convocou, para o próximo 24 de outubro, a todos os grupos políticos con representación parlamentaria para "negociar un gran pacto polo galego".