Avance do Trece Roeis Fest: Soziedad Alkoholika, Sôber, Sara Socas, Fillas de Cassandra, Rebeliom do Inframundo...

Non é habitual querer que se acabe o verán. O normal é querer que chegue canto antes, pero cando botamos unha ollada ao cartel que preparan no Trece Roeis Fest, as ganas de que cheguen os últimos días de agosto son superiores a todo o demais. E é que o festival de Pantón promete superar unha edición máis coa súa inconfundible mestura de rap, hard rock, metal, tradi e todo o que lle boten ao puchero desta cita ineludible para os máis festivaleros.

Para os días 30 e 31 de agosto, a Terra de Lemos chegarán o mellor do panorama nacional e do país. Para encabezar o cartel, a organización confirmou a dúas bandas irredutibles como son Soziedad Alkoholika e Sôber, estes últimos na súa xira polo XXX aniversario da formación madrileña. A esas doses de punk e metal hai que engadir a Sara Socas. A canaria é unha das voces máis frescas do hip-hop nacional e tanto as súas improvisacións como as súas cancións cativaron os oídos do mundo. 

Haberá, como non podía ser doutra forma, oco para os grupos locais. Os lucenses de Arrhytmia farán as delicias do público xogando como local, pero tamén Rebeliom do Inframundo ou Fillas de Cassandra, aínda que procedentes do bloque occidental da comunidade, sentirán como en casa coa calor do público a esa beira da Ribeira Sacra.

Pauliña, Biscaíño, Festicultores Troupe, TIAM GZ, Amoebo e Exeria completan esta primeira cucharadita dun cartel que promete incorporar máis nomes relevantes proximamente, cos primeiros abonos xa á venda e voando a un ritmo de vertixe. Esta V Edición vai ser máis grande que nunca. Se este ano o verán pásasenos rápido, non pasa nada, antes chegará o Trece Roeis Fest.