Propostas para o último fin de semana do ano en Galicia
A popular carreira de San Silvestre, un concerto de rock na Coruña, festa de Fin de Ano no Obradoiro... Galicia prepárase da mellor maneira para despedir o 2022
Carreira de San Silvestre: Varias cidades e pobos galegos celebran este 31 de decembro a popular carreira de San Silvestre. A Coruña, Santiago, Pontevedra, Narón, Vigo, Lugo, Ourense... En moitos recunchos da comunidade poderemos gozar deste evento deportivo e lúdico que ten lugar cada Fin de Ano.
Festa de Fin de Ano no Obradoiro: Non hai mellor maneira para un galego de celebrar a entrada ao novo ano que tomando as uvas na Praza do Obradoiro. Ás 13:30 deste 31 de decembro comezará a festa amenizada pola orquestra Fania Branco Show, que contará con uvas e cotillón gratuíto para todos aqueles que se acheguen a recibir o 2023 na capital de Galicia.
Os Mecánicos: Este trío de rock xúntase na Coruña esta Noitevella. The Beatles, Rolling Sotnes, Elvis Presley, Nei Diamond... A música destes e moitos outros artistas mesturarase este Fin de Ano no Garufa Club da Coruña da man deste novo grupo.
Serie Amarela: Últimos días para ver a exposición permanente de Xaime Quessada no Vello Cárcere de Lugo. Nela, o artista retrata, empregando cores pastel, o sufrimento humano de distintos pobos e por distintos motivos: guerras, fames negras, violacións, etc.
Belén electrónico de Begonte: Até o último sábado de xaneiro poderá visitar no Centro Cultural José Domínguez Guzmán, de Begonte (Lugo). Este Belén con pezas artesanais e con mecanismos electrónicos móbiles ten unha superficie de 150 metros cadrados e conta con máis de 150 figuras, que se renovan cada ano, feitas desinteresadamente polos veciños.
Museo Massó de Bueu: Este 31 de decembro ás 12:00 o Museo Massó de Bueu (Pontevedra) realizará unha visita guiada para todos os públicos á antiga fábrica de salgadura da praia de Mourisca.
Vos tres poquiños: Ás 18:00 horas deste sábado, a Sala Ártika de Vigo acolle o espectáculo infantil 'Vos tres porquiños'. Trátase dun teatro para os máis pequenos, no que poderá gozar toda a familia. Unha sesión de 30 minutos cargada de monicreques, teatro, xogos tradicionais e música en directo.
Escribe o teu comentario