Os equipos de Viogen da Garda Civil e outras catro entidades reciben o Premio Meninas 2022

Os equipos Viogen de Galicia da Garda Civil, a Asociación de Profesionais dos Centros de Información á Muller, o equipo feminino do Burela Fútbol sala, o Comando de Igualdade do IES Alexandre Bóveda de Vigo e a Marca Mundial das Mulleres recibirán mañá, luns, o Premio Meninas 2022.

Este premio recoñece a persoas e institucioens que incorporan estratexias, iniciativas ou proxectos para combater a violencia sobre as mulleres e promover a igualdade.

O acto estará presidido polo delegado do Goberno en Galicia, José Miñones, e terá lugar a partir das 19:30 horas no Hostal dos Reis Católicos, en Santiago de Compostela, contando coa presenza de responsables institucionais, membros xudiciais, da seguridade pública e distintos colectivos feministras e de defensa.

Nunha nota de prensa, a Delegación explicou que este acto abre a semana conmemorativa do 25 de novembro, Día Internacional contra a Violencia de Xénero.

Miñones recalcou a importancia do compromiso e a unión de todas as forzas e ámbitos sociais. Recoñeceu, ademais, o valor dos galardoados, que son o "mellor exemplo" de como a sociedade galega alza a voz en contra da violencia machista e das desiguladades de xénero.
 

MENCIÓN HONORÍFICA A MEDIOS DE COMUNICACIÓN

Co obxectivo de recoñecer o labor de xornalistas e empresas de comunicación, esta edición engadiuse unha mención honorífica a medios de comunicación. Trátase dunha mención que recoñecerá a tarefa de loita contra a violencia de xénero, tanto na sensibilización como no rigor informativo do tratamento.

O galardón recoñece o traballo da xornalista ourensá Cristina Huete Vales polo seu "compromiso coa igualdade e os dereitos das mulleres".

Tamén recibirán no acto deste luns meniones honoríficas outros organismos e entidades. Os recoñecidos son: a Unidade de Atención á Familia e Muller da Policía Nacional da Coruña (UFAM), a Unidade Contra Redes de Inmigración Ilegal e Falsidade Documental (Ucrif) da Comisaría Local de Vigo, a maxistrada titular do Xulgado de Instrución número 1 de Santiago de Compostela, Ana López-Suevos, e a Asociación Esmar Non á Violencia.