Traballador accidentado na rúa Matadoiro da Coruña en prognóstico reservado

Un operario da construción resultou ferido este mércores na Coruña ao sufrir unha caída desde máis de tres metros de altura mentres traballaba nunha obra situada na rúa Matadoiro, na  fachada ocenánica da cidade. O sinistro, que xerou gran despregamento de medios de emerxencia, volve pór sobre a mesa a cuestión da seguridade laboral no sector da construción, un ámbito historicamente marcado pola sinistralidade.

Segundo os datos facilitados polo 112 Galicia, o accidente laboral produciuse pouco despois das 12.00 horas, cando o Servizo de Urxencias Sanitarias de Galicia-061 contactou coa central de emerxencias para comunicar o sucedido e informar do envío inmediato dos seus recursos. A rápida intervención permitiu asistir ao traballador no mesmo lugar do incidente, onde se atopaba consciente, aínda que con lesións de certa consideración debido ao forte impacto contra o solo.

O Centro Integrado de Atención ás Emerxencias (CIAE-112) activou de inmediato o protocolo de emerxencias, dando aviso á Policía Nacional, á Policía Local da Coruña e aos efectivos de Protección Civil, que se desprazaron á zona para colaborar na intervención, asegurar a contorna da obra e garantir a seguridade tanto dos traballadores como dos viandantes que pasaban nese momento pola rúa.

Estado do traballador 

Fontes dos equipos de emerxencia desprazados á zona explicaron que o operario permanecía consciente tras a caída, un dato positivo tendo en conta a altura desde a que se precipitou. Con todo, o traballador presentaba lesións de carácter grave que requirían asistencia hospitalaria urxente. Os sanitarios do 061 procederon a estabilizalo antes do seu traslado a un centro hospitalario da Coruña.

Fontes da Xerencia do SERGAS na Coruña informaron a Galiciapress que o traballador sofre golpes e contusións e que está ingresado na sala de obseración de urxencias. Con todo, a pesar do seu prognóstico reservado, a gravidade das feridas non parece crítica tras unha primeira exploración.