(VÍDEOS) Arde un edificio okupado na rúa da Barreira, na Coruña, e deixa cinco feridos
O lume tivo lugar de madrugada e a intervención dos equipos de bombeiros permitiu controlar o incendio á primeira hora da mañá.
Un incendio calcinou por completo un edificio okupado na Coruña, na rúa da Barreira, deixando ademais cinco feridos que foron atendidos no propio lugar dos feitos.
Segundo informou o 112, ao redor das 3.00 horas deste martes dúas chamadas de particulares alertando do lume facilitaron a intervención dos recursos de emerxencias para facer fronte ao incendio, que comprometía a totalidade do edificio.
O servizo de emerxencias solicitou a intervención dos Bombeiros da Coruña, dos profesionais de Urxencias Sanitarias de Galicia e o apoio dos axentes da Policía Local e Nacional.
Destacan que a complexidade do incendio, propagado por todo o inmoble, obrigou a prolongar as horas de traballo dos equipos de extinción. Ás 7.00 horas, os bombeiros confirmaron que o incendio estaba controlado e asumían xa as tarefas de arrefriado e ventilación.
O edificio quedou completamente calcinado e derrubouse o tellado. Aínda que hai danos nos edificios lindeiros, afirman que non suficientemente graves como para desaloxalos.
En canto aos feridos, cinco persoas foron atendidas no punto, de idades comprendidas entre os 38 anos e os 59 anos. Ademais, outra persoa, un home de 51 anos, tivo que ser trasladado ao Hospital da Coruña por causas alleas ao incendio.
O 061 mobilizou unha ambulancia asistencial de Soporte Vital Avanzado (#SVA) e outra básica (SVB).
Escribe o teu comentario