Localizado na Coruña ao veciño de Oleiros de 92 anos desaparecido desde o luns

O veciño de Oleiros de 92 anos que faltaba do seu domicilio desde o luns foi localizado na Coruña, segundo informou o consistorio do municipio onde reside.

Sobre as dúas da madrugada, foi atopado con vida Jaime González Prado, veciño de Iñás. Estaba a camiñar polas rúas da Coruña, desorientado.

Foi localizado por unha patrulla da Policía Local e trasladado ao hospital, sendo examinado polos servizos médicos. O Concello de Oleiros trasladou o seu agradecemento ás persoas que se mobilizaron nas últimas horas.

Tamén aos efectivos da Policía Local, Garda Civil, Servizo Municipal de Emerxencias e Protección Civil que participaron no operativo.