Auxilian a un home en Oleiros do que a súa familia non tiña noticias desde había tres días

A Garda Civil do Posto Principal de Oleiros, en colaboración coa Policía e o Servizo de Emerxencias desa localidade, auxiliou no seu domicilio a un veciño de avanzada idade do que a súa familia non tiña noticias desde facía tres días.

Tal e como explicou o Instituto Armado, os fillos do auxiliado comunicaron que non tiñan noticias do seu pai desde facía tres días e, ante a posibilidade de que esta persoa sufrise algún tipo de accidente doméstico ou se atopase mal de saúde, desprazáronse até o domicilio unha patrulla desa Unidade, outra da Policía Local e persoal do Servizo de Emerxencias.

Ao non obter resposta por parte do home, os efectivos desprazados até o lugar procederon á apertura da porta da vivenda. Alí localizaron nunha das habitacións ao home desfallecido, con signos de levar na mesma posición moito tempo, pero con vida.

Así, despois de realizarlle unha primeira asistencia, os servizos sanitarios trasladárono ao Complexo Hospitalario Universitario da Coruña (Chuac).

Posteriormente, os servizos de emerxencias procederon á instalación dunha nova fechadura, entregando as chaves da mesma aos fillos do propietario.