SOS Sanidade Pública celebra que Feijóo se decate do "rexeitamento social" á súa política
A plataforma ve o presidente "nervioso" polas mobilizacións e que por iso anunciou novos centros de saúde.
Imaxe de arquivo dunha protesta contra a reforma da Lei de Saúde.
A plataforma SOS Sanidade Pública considerou que o presidente da Xunta está "nervioso" polo "gran rexeitamento social" que xera a súa política sanitaria, como a modificación da Lei de Saúde de Galicia.
Nun comunicado remitido aos medios, a plataforma cualificou de "irresponsable" o anuncio da construción de 20 centros sanitarios formulado o xoves polo máximo mandatario autonómico tras a reunión semanal do seu Executivo.
Así mesmo, asegurou que as medidas que pretende poñer en marcha a Xunta para "frear o descontento social carecen de lóxica". "Como poñer tres camas nas habitacións dos hospitais amontoando aos pacientes, negar os colapsos ou as listas de espera", sinalou.
Estas accións, para SOS Sanidade Pública, "demostran" que o Goberno galego "carece dunha política sanitaria que non sexa desmantelar, privatizar e recortar recursos sanitarios para favorecer ás multinacionais".
Con todo, considerou que as declaracións do presidente "indican" que "as mobilizacións sociais e profesionais" teñen efecto positivo sobre as actitudes da administración do PP xa que se producen na mesma semana na que a plataforma convocou concentracións ante os hospitais e centros de saúde.
Escribe o teu comentario