Primeira alerta vermella deste inverno no litoral da Coruña e Lugo

Zona acoutada no paseo marítimo da Coruña. Foto: Concello da Coruña

A Dirección Xeral de Emerxencias alerta dun temporal de nivel vermello que afectará este mércores ao litoral da Coruña e de Lugo, onde se esperan ondas de máis de oito metros.

Pola súa banda, a costa das Rías Baixas permanecerá toda a xornada en alerta laranxa por ondas de entre cinco e sete metros. Ata as 9,00 e tras as 21,00 horas esta será a alerta de todo o litoral galego.

IMAXES ESPECTACULARES

Ante esta predición, Protección Civil e Emerxencias aconsella adoptar precaucións. Por exemplo, na costa recomenda afastarse de diques, praias, espigóns e doutros lugares que poidan resultar afectados polas elevadas mareas e ondadas así como non poñer en risco a vida por tentar captar imaxes espectaculares.

Os concellos da costa coruñesa chaman á cidadanía a "extremar a precaución" e a non achegarse a praias e zonas próximas ao litoral. A cidade herculina mantén pechados os accesos ás praias desde o martes.

Desde Valdoviño, o Concello reforzou o operativo de vixilancia no litoral e non descarta cortar o viario de acceso ao faro de Punta Frouxeira, "especialmente frecuentado en días de temporal e a pesar das recomendacións" de non visitar a zona por motivos de seguridade.

Así mesmo, o Goberno local de Ferrol suspendeu todas as actividades marítimas na zona e recomendou tomar medidas para asegurar embarcacións, estruturas e materiais que poidan verse afectados, ademais de solicitar aos veciños que eviten aproximarse a praias, costa e portos.