Formoso confirma contactos con outros aspirantes para unificar as candidaturas

|

Formosopsdeg


O presidente da Deputación da Coruña, Valentín González Formoso, confirmou este venres que xa mantivo contactos con tres dos candidatos ás primarias do PSOE na provincia e enxalzou como "unha mostra de compromiso" coas siglas que sete "valentes" --entre eles, el mesmo-- opten a dirixir o partido.


Tras un acto na Coruña, preguntado sobre as negociacións abertas entre os aspirantes, confirmou que xa falou con Mercedes Rosón, ex concelleira en Santiago; o tenente de alcalde en Culleredo, Diego Taibo, e o alcalde de Cariño, Miguel Alonso Pumar.


"E falaremos moitas veces porque somos compañeiros que buscamos mellorar a capacidade do PSOE para gañar a isto, entre outros", dixo, aludindo así, entre risas, ao rexedor coruñés, Xulio Ferreiro, presente no acto.


Ademais do tamén alcalde das Pontes e as tres persoas coas que mantivo conversacións, tamén avanzaron a súa vontade de concorrer ás primarias do PSOE na provincia coruñesa Lois Fermín Vázquez, militante da cidade herculina; Javier González Trillo, de Mazaricos, e o rexedor de Ares, Julio Iglesias.


"MELLORAR" O PARTIDO


Sobre os aspirantes, incluído tamén el, dixo que se trata de "xente proactiva, coherente e respectuosa coas formas"; e, en canto ao número, considerou que é "unha mostra de que hai preocupación no partido por mellorar a súa situación".


"Que non é a mellor", recoñeceu o presidente da Deputación da Coruña e alcalde das Pontes. Por iso, cualificou de "mostra de compromiso" que haxa "sete valentes que se atreven a dar este paso".


CONTACTOS


Nas últimas horas, seis dos sete socialistas que avanzaron a súa intención de pugnar polas rendas do PSOE na provincia da Coruña, é dicir, todos os aspirantes salvo o presidente da Deputación, iniciaron contactos para explorar a posibilidade de formar unha candidatura única.


Con todo, segundo fontes socialistas consultadas por Europa Press, a ausencia do principal dirixente institucional do PSOE na provincia non respondeu a unha "exclusión", senón que obedeceu á necesidade de analizar o novo escenario xerado pola "sorpresa" de que finalmente Formoso decidise concorrer ás primarias.



relacionada Os catro liderados provinciais do PSdeG decidiranse entre 16 aspirantes

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.
Cabecerarecomendadosgal 2
Cabeceraultimahora 2
Cabeceralomasleidogal 1


Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress