Amancio Ortega crea a filial inmobiliaria Pontegadea España

Unha tenda de Zara en Barcelona

Amancio Ortega ampla o seu horizonte corporativo coa creación dunha filial inmobiliaria en España baixo Pontegadea, vehículo investidor do fundador de Inditex. A empresa pretende aglutinar activos valorados en máis de 1.600 millóns de euros, incluíndo a Torre Cepsa ou o edificio Gran Vía 32, onde se sitúa unha das maiores tendas Primark de Europa.

Concretamente, Pontegadea Inmobiliaria, terá como filial a Pontegadea España, unha sociedade na que Ortega unificará todo o seu negocio inmobiliario no mercado español, como xa fixo en países como Estados Unidos, Francia ou Reino Unido. En total, a firma Pontegadea Inmboliriaria conta con activos valorados en máis de 6.700 millóns de euros.

O obxectivo da creación da filial é o de "dispoñer dunha estrutura máis homoxénea nos mercados nos que opera Pontegadea Inmobiliaria". De feito non foi necesaria a constitución dunha sociedade para esta actividade no mercado español, xa que Pontegadea contaba coa sociedade Torre Norte Castelá, polo que só foi necesario cambiar o nome a Ponteadea España, incorporando á súa vez a actividade de arrendamento de inmobles en España, segundo os datos publicados polo Boletín Oficial do rexistro Mercantil. En Madrid, ademais das xa citadas Torre Cepsta e Gran Vía 32, Ortega conta con outros inmobles como a Torre Picasso ou o edificio Castella 79, que alberga o Zara máis grande do mundo.

Amancio Ortega ingresou este ano un total de 1.256 millóns de euros en concepto de dividendos da compañía a través das sociedades Pontegadea Investimentos e Partler, coa que controla o 59% das accións de Inditex. Á súa vez, o empresario pechou 2016 con activos inmobiliarios valorados en 6.719 millóns de euros, 661 millóns máis que o ano 2015. Parte dos dividendos que recibe de Inditex invísteos no sector inmobiliario, posuíndo a maior inmobiliaria española, centrada na compravenda de grandes edificios, integrada fundamentalmente en edificios de oficinas situados no centro de grandes cidades de Europa ou Asia.