Os profesionais sanitarios denunciaron 174 agresións na primeira metade do ano

Os profesionais sanitarios de Galicia contarán cun interlocutor policial para reducir as agresións neste ámbito, que no primeiro semestre de 2017 alcanzaron os 174 episodios na Comunidade galega, superado xa o número de casos que se deron en todo 2016.

O delegado do Goberno en Galicia, Santiago Villanueva, e o conselleiro de Sanidade, Jesús Vázquez Almuiña, reuníronse este martes en Santiago para abordar o protocolo de actuación ante as agresións laborais externas que sofren os profesionais sanitarios.

Ao encontro asistiron tamén representantes dos colexios médicos e de enfermería das catro provincias galegas, xunto a responsables da Garda Civil e Policía Nacional.

Segundo os datos facilitados pola Consellería de Sanidade, entre xaneiro e xuño de 2017 contabilizáronse en Galicia 174 episodios de agresións a profesionais sanitarios, das que o 64,4 por cento foron de carácter verbal.

A Delegación do Goberno informou nun comunicado de prensa que no encontro, Villanueva anunciou que "Galicia xa conta con dous responsables, un de Garda Civil e outro de Policía Nacional, que representan a figura do 'Interlocutor Policial Territorial Sanitario' para coordinar a aplicación de medidas para reducir as agresións neste sector".

No encontro, celebrado na Consellería de Sanidade, estiveron presentes o xefe superior de Policía Nacional, Manuel Vázquez, e o xeneral xefe da XV zona da Garda Civil, Ángel Alonso.

"PASO IMPORTANTE"

Durante a reunión Santiago Villanueva transmitiu a preocupación do Goberno central polo incremento de agresións no sector sanitario. Así, asegurou que "este é un paso importante para garantir a seguridade daqueles que velan pola nosa saúde".

Ademais, explicou que "se establece un protocolo de actuación ante calquera agresión ou manifestación de violencia e intimidación dirixida ao persoal sanitario". "A instrución 3/2017 dá resposta ás demandas de seguridade por parte do sector e é un mecanismo que lles proporciona maior protección e seguridade xurídica", apostilou.

"Todo isto é un paso máis no compromiso do Goberno para dar unha nova resposta policial, integral e transversal cunha actuación coordinada entre todos os responsables da seguridade no ámbito médico", sinalou o delegado do Goberno.

Os 'Interlocutores Policiais Territoriais' sanitarios, son tal e como incidiu Villanueva, "profesionais designados por Garda Civil e Policía Nacional para lograr un contacto máis fluído e directo cos corpos de seguridade en caso de agresión".

Pola súa banda, nun comunicado de prensa, a Consellería de Sanidade apuntou que este protocolo de actuación "dará resposta ás demandas de seguridade por parte do persoal que traballa nos centros do Sergas". Ademais, engadiu que supón "un mecanismo que lles proporcionará unha maior protección e seguridade xurídica".