22 pilotos do Rallye San Froilán, cazados 'de tramo' en estradas abertas

A Garda Civil de Lugo formulou 69 denuncias durante o Rallye San Froilán que se desenvolveu durante a xornada do sábado 28 de outubro, entre eles a un participante na proba que foi localizado cando circulaba a 117 quilómetros por hora nun tramo limitado a 60.

Segundo informou o Instituto Armado, o Subsector de Tráfico de Lugo durante os días nos cales se desenvolveu o Rallye San Froilán, especialmente na xornada do sábado día 28, formulou 69 denuncias a vehículos que participaban neste evento.

Os equipos de verificación de velocidade detectaron 196 infraccións por excesos de velocidade sobre os límites establecidos para cada tramo das diferentes vías, ben de ligazón entre tramos ou as que unen os tramos de mañá e tarde.

Do total de infraccións detectadas polos equipos de verificación da velocidade, 22 foron a vehículos implicados nesta proba deportiva, "resaltando a detectada a un participante, o cal circulaba a 117 quilómetros por hora nun tramo de vía con limitación de velocidade máxima a 60", destaca a Benemérita.

Así mesmo, por parte das diferentes patrullas situadas dentro do dispositivo especial que, con motivo da celebración desta proba deportiva despregara o Subsector de Tráfico, observáronse 47 infraccións a outro tipo de normas no marco da Lei de Seguridade Viaria.

ALCOL E DROGAS

Dentro desta mesma operación especial realizáronse tres controis de verificación de alcol e drogas nos cales se constataron tres positivos a condutores por consumo de alcol e outros tres por drogas.

O Instituto Armado sinalou que durante os días nos cales se celebrou esta proba deportiva non se produciron accidentes de circulación de gravidade.