Rufián mete a Galicia no desafío independentista coa proclama: "Viva Galiza ceibe!"

Estende o desafío ao "resto de nacións sen Estado".

O portavoz adxunto de ERC, Rafael Rufían, estendeu o desafío independentista que a Generalitat leva a cabo en Cataluña a outras rexións de España e expresou o "viva Galiza ceibe".

Así se pronunciou este mércores durante a sesión de control no Congreso, onde o ministro de Xustiza, Rafael Catalá, recalcou que é "mentira" que o referendo independentista suspendido polo TC sexa a "manifestación da democracia".

Rufián aproveitou a súa quenda para asegurar que o que está a buscar Cataluña "nin máis nin menos" é "recuperar o país que lle roubaron hai 80 anos" e continuou dicindo que o desafío independentista tamén se fai por España e polo "resto de nacións sen Estado dese país de países chamado España".

Esta afirmación levantou mostras de asombro e desconformidade no Pleno. "Viva Castela libre, viva Andalucía libre, gora Euskalherria askatuta, viva Galiza ceibe", expresou o deputado catalán.

Ademais, o deputado de ERC asegurou que ir votar este domingo non converte a ninguén en independentista, senón que, ao seu xuízo, o "fai demócrata, valente e antifascista".

"A ver se lle sobra algún ferry ou un 'a por eles' para ir buscar a boa xente que está afogando no Mediterráneo", dixo Rufián en relación ás embarcacións con axentes da Policía en Barcelona e cánticos de apoios á Garda Civil.