Os procesados pola Operación Campeón aceptan condenas atenuadas antes do xuízo

Jorge Dorribo, o empresario lugués e principal acusado da Operación Campeón, unha trama para conseguir subvencións do Igape de forma frauduluenta, chegou este martes a un acordo coa Fiscalía para aceptar a condena proposta.

Nunha vista preliminar celebrada na Audiencia provincial de Lugo, á que estaban citados os 13 procesados, o empresario aceptou unha pena de máis de cinco anos de prisión e unha multa de 6,1 millóns de euros.

Só un dos acusados se negou a chegar a un acordo, polo que terá que sentar no banco. Javier Rodríguez, de Proitec, mostrouse convencido de que a instrución da xuíza Estela San José será declarada nula.

Deste xeito, o xuízo oral terase que celebrar igualmente o próximo 24 de outubro --a falta da resolución previa da nulidade pedida por Javier Rodríguez---, pois só se suspendería se todas as partes pactasen coa Fiscalía.

CONDENAS ATENUADAS

O resto asumiron a súa culpa a cambio de condenas atenuadas, por dilacións indebidas e por contribuír a "reparar o dano causado", ao consignar diñeiro.

Xunto a Dorribo, o seu socio, Arsenio Méndez, afronta outra das penas máis altas, de case dous anos de prisión e unha multa de dous millóns.

E aínda que a ex directora de Financiamento do Igape Cristina Quintela foi absolta, outros dous altos catgos do instituto dependente da Xunta, aceptaron unha multa de máis de 2.000 euros e a suspensión de emprego e soldo durante un ano.

O deputado do PP implicado, pola súa banda, aceptou oito meses de cárcere e máis de 45.000 euros de multa por tráfico de influencias, ademais de quedar inhabilitado dous anos e tres meses para cargo público.