Ana Pontón chama a saldar a "débeda ética coas vítimas" do franquismo

A líder do Bloque tacha de "indecencia" que Rajoy non gaste "nin un euro" na memoria "mentres Feijóo doa 53.000 aos Franco".


|

MestremateoesculturasbngConcentración do BNG polas esculturas.


A portavoz nacional do BNG, Ana Pontón, tachou de "indecencia política que Rajoy presuma de non gastar nin un euro na aplicación da lei estatal da memoria histórica, mentres Feijóo desde a Xunta doa 53.000 á familia Franco para xestionar as visitas a un pazo que é propiedade dos galegas".


En plena polémica polo Pazo de Meirás e outras propiedades espoliadas polo Franquismo en Galicia, Pontón criticou que o pazo "está convertido nun parque temático de exaltación do franquismo".


Fronte a iso, nun acto este sábado, fixou como prioridade para os nacionalistas dunha lei de memoria histórica galega o resarcimento ás vítimas da ditadura.


En concreto, Pontón participou na homenaxe do Bloque a Pedro Galán Calvete, quen fora secretario de organización das mocidades galeguistas asasinado polos golpistas con apenas 19 anos, e cuxo cadáver apareceu nunha cuneta da Corveira na Coruña o 16 de setembro de 1936.


"DÉBEDA ÉTICA"


Ao comezo do acto, no cemiterio coruñés de San Amaro, destacou que o texto para unha lei galega de memoria histórica que o BNG remitirá ao Parlamento en breve ten "como un dos principais obxectivos establecer os mecanismos necesarios para resarcir e restituír a dignidade de todas as vítimas do franquismo".


"Temos esa débeda ética coas vítimas, con todas as persoas que, como Pedro Galán, loitaron pola liberdade, pola democracia, por un país mellor, e nesa loita perdérono todo, mesmo a súa vida, como no caso deste mozo galeguista cuxo único delito foi plantarlle cara ao fascismo", subliñou.


"Por iso, o BNG quere que Galicia conte cunha lei propia de memoria histórica que supoña un recoñecemento das vítimas do fascismo e lles brinde unha reparación xurídica e económica, lei que estamos a ultimar para enviar ao Parlamento e sometela a debate e consideración do resto dos grupos, despois de solicitar as propostas de asociacións, entidades e investigadores nesta materia", explicou.


COMISIÓN DA VERDADE


O BNG reivindica unha política pública da memoria desde o Goberno galego con máximo rango institucional, que sexa transversal e participativa, que inclúa anular todos os xuízos e as condenas ditadas polos tribunais do franquismo entre 1936-1975, exhumación das vítimas en fosas comúns cun plan específico e a supresión de toda a simboloxía fascista.


Propón tamén a creación dunha comisión da verdade, unha oficina de atención ás vítimas así como a elaboración dun amplo estudo que recolla a información da represión pero tamén da loita de resistencia contra o franquismo, por exemplo a guerrilla, e que se faga a través do sistema educativo e dos medios de comunicación públicos.


O acto tamén contou coa participación de Pedro Galán Horro, en nome da familia, Francisco Rodríguez e Pilar Pallarés.


relacionada Aposta por recuperar gratis Meirás acreditando que a súa 'doazón' foi unha fraude
relacionada As esculturas de Abraham e Isaac pertencen "aos veciños de Santiago"

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE