Lugo acollerá o próximo 23 de setembro o segundo Festival do Leite

Fotografía da primeira edición.

A cidade de Lugo acollerá o vindeiro venres 23 de setembro, na "contorna" do Pazo de Feiras, o segundo Festival do Leite, que o pasado ano tivo lugar na capital galega.

Pedro Boquete, un dos responsables da marca Deleite, presentou este venres, no centro cultural O Vello Cárcere da cidade amurallada, o segundo Festival do Leite que promove esta empresa. Na presentación tamén participaron a alcaldesa da cidade, Lara Méndez, e o humorista e "padriño" da marca, José Antonio Touriñán.

Durante o seu discurso, Boquete presumiu de que Lugo é "a capital láctea de Galicia". "Si merecía e seguramente foi inxusto non celebrar aquí o primeiro festival", sinalou, xa que o primeiro festival do Leite tivo lugar en Compostela o pasado ano cunha presenza de máis de 8.000 persoas, cifra que a organización espera superar na capital lucense.

Cun cartel de cinco grupos, o festival abrirase ao mediodía con entrada gratuíta, aínda que se pedirá aos que acudan que doen "produtos de primeira necesidade" para transferilos ao Banco de Alimentos.

Touriñán, cuxa intervención non estivo exenta de humor, incluso emulando o Rei emérito á hora de saudar, trasladouse á súa infancia durante o seu discurso para subliñar o valor do leite e o que lle dicía súa avoa: "Toma dous vasos que así vas crecer máis".

Pola súa banda, a alcaldesa, Lara Méndez, destacou a alta incidencia da gandería no Concello, con "máis de 400 explotacións", das que "máis da metade" se dedican ao sector lácteo.