O TAD dá o primeiro paso para apartar a Villar da Federación

Villar, máis preto da súa suspensión.

O Tribunal Administrativo do Deporte acordou a apertura de expediente disciplinario ao presidente da Real Federación Española de Fútbol, Ángel María Villar, dando un paso máis cara á previsible suspensión cautelar do dirixente.

Así o anunciou o presidente do TAD, Enrique Arnaldo, confirmando este trámite que era indispensable para que o Consello Superior de Deportes, que a súa directiva se reunirá este martes, proceda á inhabilitación de Villar.

O presidente da RFEF durante as tres últimas décadas, está acusado dos delitos de administración desleal, apropiación indebida, estafa, falsidade documental e corrupción entre particulares.

A LIGA SERÁ ACUSACIÓN PARTICULAR

A Comisión Delegada de LaLiga, na súa reunión ordinaria celebrada este venres, acordou que o organismo se presentará como acusación particular na causa contra Ángel María Viilar e solicitou a intervención xudicial da Real Federación Española de Fútbol.

Así o anunciou a patronal dos clubs a través dun comunicado, confirmando as intencións xa expresadas polo seu presidente. O pasado venres, Javier Tebas asegurou que Villar "xa é historia do fútbol español". "Queda sacar da casa o villarismo, a forma de xestionar. De nada vale que non estea Villar se non cambia o sistema de corruptelas, de beneficios e de falta de transparencia da governanza. Abriuse unha xanela, pero aínda quedan moitas para abrir".

INTERROGATORIOS ATA A SEMANA QUE VÉN

O maxistrado da Audiencia Nacional Santiago Pedraz comeza este martes a rolda de interrogatorios a máis dunha decena de investigados na operación 'Soule' relativa a unha presunta trama de corrupción na Real Federación Española de Fútbol.

Segundo fontes xurídicas, a rolda prolongarase ata mediados da semana que vén. Os investigadores céntranse agora en estudar toda a documentación incautada nos rexistros e que supera as 40 caixas.