Fraga pedía doazóns "a todo o mundo" e dábanlle cheques nos mitins

|

FragamitinppdegManuel Fraga, durante un mítin. Foto: PPdeG

O que fora tesoureiro do PP entre xaneiro de 1989 e abril 1990, Rosendo Naseiro, asegurou este xoves na comisión de investigación do Congreso sobre o suposto financiamento irregular do partido que Manuel Fraga pedía diñeiro "a todo o mundo" e "ingresábase na conta que había para a campaña".


E cando eran donativos, proseguiu, tamén había unha conta aberta de donativos anónimos. "Pero non sei o numero agora nin mo pregunte", apostilou, para engadir despois que "unha señora que se chamaba Begoña Urquijo" collía "moitos deses cheques" porque "tiña poderes coma o tesoureiro e o secretario".


Iso si, mostrouse convencido de que Fraga, que foi presidente do PP e da Xunta de Galicia, non quedaba cos talóns que recibía nos mitins, pero admitiu que "se cadra algunha vez" recibiu algún talón con "un pouquiño de diñeiro" que entregou aos escoltas e que estes levarían ao partido. Agora ben, deixou claro que Fraga "non gastaba un peso do partido" nin el tampouco.


IMPUXO COTAS AOS DEPUTADOS


Ademais, subliñou que na súa etapa de tesoureiro non se pagaron sobresoldos nin "complementos". "Non se pagaron sobresoldos comigo, nin se asinaron recibos nin cousas privadas", recalcou. É máis, dixo que cando estaba á fronte das contas puxo un imposto, xa que lles "cobraba o 10%" aos deputados e "dicían que era un imposto revolucionario". "Iso fíxeno eu dentro do PP e Álvarez Cascos veu e quitouno", resaltou.


Naseiro defendeu que o financiamento no PP era legal e que todo o diñeiro que recibía ingresábase nunha conta que controlaban "unhas señoras militantes do PP" para, despois, xustificalo ante o Tribunal de Contas. "Eu sempre dei conta a ese tribunal de todo o que se facía", apostilou.


Relatou que o diñeiro que manexaba o PP "maioritariamente" procedía das partidas que os Orzamentos Xerais do Estado destinan aos partidos e que se se "administraba ben" chegaba para financiar as campañas electorais. "Non había outro tipo de financiamento. Non busquemos cousas raras", apuntou.


CAIXA B


Durante a súa comparecencia, Naseiro tachou de "falso" que con el comezase a 'caixa B' do PP, tal e como asegurou o tamén ex tesoureiro Luís Bárcenas. "Totalmente falso. Falso e mentira", manifestou Naseiro, subliñando que a 'caixa B' non a viu e que se enterou recentemente da súa suposta existencia.


Ao ser preguntado pola primeira anotación dos 'papeis de Bárcenas' que di que lle entregou diñeiro ao ex tesoureiro, Naseiro dixo que non recibiu nin soubo nada dos seus pagos "ocultos" e desa "caixa B". O ex tesoureiro admitiu que lle vendeu "algún cadro" a Bárcenas pero que, en calquera caso, non foi un "de gran importancia", senón "meramente decorativos" porque, segundo as súas palabras, o ex senador "non entendía de cadros".


Como fixera na súa comparecencia como testemuña na Audiencia Nacional o pasado mes de marzo, Naseiro pretendeu desmontar así a explicación de Bárcenas, que apuntou que parte da fortuna que tiña en Suíza procedía de operacións de compravenda de arte, algunhas das cales realizaban xuntos.


Por iso, dixo descoñecer por que Bárcenas quere utilizalo como "coartada" para xustificar a súa fortuna en Suíza, como se lle preguntou. "O señor Bárcenas pode dicir o que queira, el saberá", pero "eu non comprei cadros con Bárcenas", comentou.


"ISTO É UN TRIBUNAL", DENUNCIA


O ex tesoureiro do PP queixouse de que a oposición lle estivese sacando o 'caso Naseiro' cando está "moi ben aparcado" polo Tribunal Supremo e chegou a denunciar que se lle estaba tentando xulgar coma se o Congreso fose un "tribunal".


"Isto é ilegal", dixo nalgún momento Naseiro, que tamén cuestionou que agora se lle estea preguntando se se acorda de cuestións despois de 30 anos. "Despois de 30 anos veñen dicir agora se me acordo disto ou daquilo? Pois de moitas cousas, non", indicou.


CONTA EN SUÍZA


O ex tesoureiro dixo que non lembra que tivo contas en Suíza --"se cadra si", comentou--, e só rememorou que mandou "algún diñeiro" a ese país helvético porque tiña un neto que estaba enfermo que acudira alí. Agora ben, sentenciou que non operou con ningunha conta do partido en Suíza.

relacionada O PP quéixase de que a investigación sobre a súa 'caixa b' é "inquisitorial" e non descarta levala aos tribunais
relacionada Luís Fraga recréase na súa interpretación da 'caixa B' e os "papeis de Xénova"
relacionada Bárcenas insiste en que gardaba nunha 'caixa B' doazóns de empresarios

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress