David Oubel non cumprirá a súa condena nun cárcere galego

O parricida de Moraña, durante o xuízo.

David Oubel, o primeiro condenado a prisión permanente revisable de España polo asasinato das súas fillas en Moraña en 2015, cumprirá a súa pena a centos de quilómetros de onde cometeu o crime.

A intención de Institucións Penitenciarias, que apuntan varios medios de comunicación, é trasladalo canto antes de volta á prisión leonesa de Mansilla de las Mulas, a uns 360 quilómetros da súa casa. Alí estivo en prisión provisional case todo o tempo desde que foi detido.

O seu traslado desde A Lama, onde permaneceu recluído para asistir ao xuízo, está motivado polas ameazas de morte que sufriu o parricida apenas días despois de ser arrestado en 2015.

No penal leonés, por orde da dirección, estivo todo este tempo no módulo de enfermería. Segundo os medios locais, Oubel integrouse con "normalidade" entre os reclusos, aínda que quen convive con el sinalan a falta de empatía e a frialdade que demostrou durante o xuízo.