A Xunta abre expediente ás empresas de autobús por incumprir os servizos mínimos

|

Ethelvazquezromanrodriguez


A Xunta de Galicia vai abrir expediente informativo, que pode derivar en sancións, ás empresas de autobús por incumprimento "flagrante" dos servizos mínimos establecidos para a folga deste martes e mércores, que continuará as próximas semanas, de maneira indefinida, ata que haxa unha solución ao conflito.


Así o anunciaron este mércores os conselleiros de Infraestruturas e Educación, Ethel Vázquez e Román Rodríguez, respectivamente, tras analizar conxuntamente o impacto dos paros.


Uns paros que provocaron que na primeira xornada quedasen sen transporte escolar 67.500 alumnos e neste segundo día de folga uns 57.000, posto que, aínda que o incumprimento dos servizos mínimos nestes servizos foi maior o mércores, moitos pais puideron prevelo.



Busessantiago


E é que, como no primeiro día de paro --este martes--, os traballadores secundaron masivamente a convocatoria dos sindicatos en contra do plan de reordenación das liñas que pretende implantar a Xunta e tamén para reivindicar á patronal o desbloqueo dos convenios colectivos.


Non só iso, senón que se incumpriron outra vez os servizos mínimos fixados polo Executivo autonómico, establecidos no 100% para os servizos escolares e no 40% para os regulares.


De aí que se notase nas vías galegas un aumento significativo da circulación de vehículos privados desde primera hora da mañá.


Se este martes as centrais sindicais cifraban nun 90-95% o seguimento, este mércores xa o elevan ata practicamente o 100%, de acordo coas fontes consultadas por Europa Press.


Así, Beatriz Meilán, de UXT, sinala que nesta xornada non se mobilizou "nin o pouco que saíu onte" das diferentes cocheiras e estacións de autobuses, onde se concentran os piquetes das organizacións sindicais.


Destaca, como Marcos Pérez, de CCOO, e Xesús Pastoriza, da CIG, que esta circunstancia responde á boa resposta dos traballadores, que secundan na súa totalidade o paro, e "sen incidencias" de relevancia.


Por iso, os sindicatos mandan unha "mensaxe clara" ao Goberno galego: "procede que reconsidere posturas; o máis sensato é sentar e negociar", afirma Meilán.


Pola súa banda, Pérez subliña que o sector está "disposto a utilizar toda a súa forza para que a Administración reverta" os seus plans e as empresas debloqueen a negociación colectiva.


E Pastoriza incide en que "cando queira" Infraestruturas, debe chamalos, pois os representantes dos traballadores están abertos "a falar", pero nunha mesa "tripartita", entre Administración, federacións e centrais, para negociar un novo anteproxecto.


Un anteproxecto cuxo punto máis polémico é o relativo á integración do transporte escolar en liñas regulares nas rutas deficitarias do rural, algo que, segundo UXT, CCOO e CIG, vai supoñer a perda dun milleiro de postos de traballo --extremo que nega a consellería--.


AS OUTRAS DÚAS PARTES


As federacións de empresarios, pola súa banda, tamén se opoñen ao documento que preparou a Consellería de Infraestruturas, á que instan a reaccionar para frear a folga polas perdas económicas que supón e o prexuízo para os usuarios.


O departamento de Ethel Vázquez, do seu lado, chamou á responsabilidade aos sindicatos, polas consecuencias para escolares e traballadores.


Xustamente esta mañá, Vázquez e o conselleiro de Educación, Román Rodríguez, reúnense no Parlamento galego para abordar a problemática.

relacionada A Xunta nega que o novo plan do transporte vaia recortar 1.000 empregos
relacionada O gran seguimento da folga de autobuses en Galicia deixa 'tirados' a miles de usuarios
relacionada Sindicatos e patronal dan plantón á Xunta a 24 horas do inicio da folga de transporte

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress