Os trens Alvia entre Madrid e Galicia, suxeitos a transbordos por obras do AVE en Zamora

Os traballos que Adif Alta Velocidade efectuará entre os días 12 e 21 de xuño dentro da construción da Liña de Alta Velocidade (LAV) Madrid-Galicia afectarán o servizo ao seu paso por Zamora.

En concreto, trátase da adecuación da plataforma ferroviaria na marxe esquerda do traxecto entre o cambiador de anchos da estación de Zamora e a Bifurcación O Bolón, nun percorrido aproximado de 180 metros.

Para esta actuación, que consiste na consolidación do terreo base, é necesario proceder ao desmonte de vía, para, posteriormente, sanear a plataforma nunha profundidade de aproximadamente 2 metros, encher o terreo e repoñer a vía desmontada á súa posición inicial.

As tarefas pódense levar a cabo nesta fase, unha vez posto en servizo o novo tramo de vía en ancho convencional (1.668 milímetros) entre Zamora e Valderrey. A actuación desenvolverase entre a vía de ancho convencional e a vía de saída do cambiador de anchos, sentido Galicia.

Adif Alta Velocidade lamenta as molestias que estas actuacións ocasionen aos usuarios e agradece a súa comprensión.

SERVIZOS MODIFICADOS

As obras, relacionadas coa construción da LAV Madrid-Galicia, obrigan a deixar fóra de servizo por uns días o cambiador de anchos da estación de Zamora, coa consecuente afectación a todas as relacións ferroviarias Madrid-Galicia, en ambos os sentidos.

Renfe deseñou un plan alternativo de transporte entre os días 12 e 21 de xuño. O plan comprende o transbordo entre trens (cunha duración aproximada de 8 a 10 minutos de demora) na estación de Zamora.

Veranse afectados por estes transbordos todos os trens Alvia entre Madrid e Galicia (en ambos os sentidos), a excepción do Alvia Madrid Chamartín con saída habitual ás 7,15 horas que adianta a súa saída ás 6,15 e, por tanto, chegará a Pontevedra ás 13,53 horas; e o tren Alvia entre Ferrol (con saída ás 13,25 horas) e Madrid Chamartín, que chegará unha hora máis tarde do seu horario habitual.

Os trens Alvia entre Madrid Chamartín (con saída ás 9,15 horas) e Ferrol (chegada ás 16,04 horas) e entre Ferrol (saída ás 5,55 horas) e Madrid Chamartín (chegada ás 13,17 horas), ademais do transbordo en Zamora, realizarán por estrada o traxecto entre A Coruña e Ferrol.

Doutra banda, os dous servizos Alvia entre Lugo e Madrid, que ven trasbordados en Zamora en ambos os sentidos, fan o percorrido por estrada a partir de Ourense.

O servizo rexional entre a Pobra de Sanabria (con saída ás 6,50 horas) con destino Valladolid (chegada ás 9,55 horas) adianta a súa saída en 12 minutos. En sentido inverso, entre Valladolid e Pobra de Sanabria, chegará con aproximadamente seis minutos de demora.