O 'si' gaña no referendo de Silleda por unha marxe mínima

Imaxe da xornada de votación. //Foto: Concello de Silleda

Silleda agrupará finalmente as instalacións municipais nas dependencias da Casa da Cultura. Este domingo, o concello pontevedrés acolleu un referendo impulsado polo goberno local, dirixido polo socialista Manuel Cuíña, para unificar nun mesmo espazo os espazos agora repartidos en tres lugares diferentes da localidade.

Finalmente, o 'si' impúxose cun 48,5% dos votos, fronte ao 46% dos votantes que se decantaron polo non. A participación quedou nun 27,47% do censo, ao emitirse un total de 2.179 votos. Así mesmo, houbo 88 votos en branco, o 4%, e 31 nulos.

A pesar da marxe tan estreita, o 'si' gañou en 11 das 13 mesas electorais que se puxeron a disposición dos silledenses.

Ao remate da xornada electoral, Manuel Cuiña, acompañado polo grupo de goberno agradeceu, tal e como informa o Concello, "a todos os veciños e veciñas" a súa participación nesta consulta "nunha xornada na que fixemos historia e que se celebrou dunha forma exemplar". "Hoxe gañou a democracia e todos os veciños e veciñas que así o quixeron tiveron a oportunidade de decidir sobre o futuro da Casa Consistorial", manifestou.

Con este resultado, o alcalde indicou que o grupo de goberno empezará a buscar financiamento a través doutras Administracións e a encargar a redacción do proxecto "para que Silleda teña unha Casa Consistorial máis moderna, ampla e accesible para todos".