Malestar entre os xuíces polo plan do CGPJ ante as claúsulas chan
Xuíces da Coruña critican que non haxa "medidas de reforzo" fronte a avalancha de demandas prevista. Avogados coruñeses ofrecen o seu asesoramento gratuíto aos afectados.
Xuíces de primeira instancia da Coruña expresaron o seu malestar pola forma en que se pretende poñer en marcha o plan do Consello Xeral do Poder Xudicial (CGPJ) para facer fronte ás posibles demandas polas cláusulas chan.
Como resultado da reunión da xunta sectorial mantida por estes xuíces (con excepción dos de Familia), enviaron un comunicado no que denuncian "escurantismo" na aplicación deste plan, polo que, no caso da provincia da Coruña, recaerían estas demandas no xulgado de primeira instancia número 7.
Por outra banda, sinalan que atribuír esta competencia ao citado xulgado "sen medidas de reforzo oportunas supoñerá unha sobrecarga de traballo inasumible e intolerable para un órgano xudicial xa de si sobrecargado de traballo".
Por iso, entre outras cuestións, estes xuíces expoñen a "necesidade" de que se designe, desde o inicio e non unha vez que se supere un determinado número de asuntos, un xulgado de reforzo "nos mesmos termos en que se fixo para afrontar a problemática das participacións preferentes e obrigacións subordinadas".
ASESORAMENTO GRATUÍTO A AFECTADOS
Avogados da Coruña prestarán asesoramento gratuíto a afectados por cláusulas chan, en virtude dun convenio subscrito entre o decano da entidade colexial, Augusto Pérez-Cepeda Vila, e o alcalde, Xulio Ferreiro.
Entre os servizos que levarán a cabo dentro deste asesoramento previo á vía xudicial, "atópase a identificación dos casos nos que foron aplicadas este tipo de cláusulas consideradas abusivas por varias sentenzas xudiciais", explica a entidade colexial.
Escribe o teu comentario