Desestimado o recurso de Nova Pescanova sobre vantaxes patrimoniais na fusión

A Audiencia Provincial de Pontevedra desestimou o recurso de apelación interposto por Nova Pescanova polo que consideraba vantaxes patrimoniais nos acordos de fusión e dobre segregación a favor da 'vella Pescanova'.

Como resultado das modificacións estruturais e da ampliación de capital, foi necesario establecer algunhas medidas de apoio de Nova Pescanova a favor da 'vella Pescanova', que inicialmente ostentaba o 20% da pesqueira e agora reduciu ao 1,7%, co fin de garantir a continuidade e estabilidade desta última, que mantén unha débeda concursal e post-concursal duns 64 millóns de euros.

En concreto, Nova Pescanova referíase a vantaxes como a obrigación de prestar á 'vella' Pescanova o necesario apoio administrativo, fiscal e legal para o seu correcto funcionamento libre de custos durante un prazo de catro anos a partir do 1 de decembro de 2015, así como o dereito para dispoñer permanentemente dunha oficina de polo menos 60 metros cadrados dentro do domicilio social libre tamén de custos.

A iso sumábase, ademais, a retención "por razóns de prudencia e de eficacia operativa" de 1,9 millóns de euros como garantía para os acredores concursais de Nova Pescanova, que formalmente quedan no balance da 'vella' Pescanova.

"Tendo en conta que Pescanova quedaba con débeda e debía manter certa actividade, aínda que fose mínima, para facer fronte a dita débeda, e que transmitira, produto da fusión, practicamente toda a súa actividade económica a Nova Pescanova, debe considerarse directamente relacionado con esta situación real o mantemento de certo apoio administrativo, fiscal e legal", sinalan os maxistrados, quen considera que "a situación en que quedan as sociedades participantes na modificación estrutural non pode verse como unha situación totalmente independente".

A Audiencia Provincial de Pontevedra desestimou o recurso de apelación de Nova Pescanova cinco meses despois de que o Xulgado do Mercantil número 1 de Pontevedra desestimase tamén a demanda que a pesqueira interpuxo contra a 'vella' Pescanova na que lle solicitaba unha indemnización polas supostas vantaxes nos acordos de fusión e dobre segregación e condenase á primeira ao pago das costas procesuais.

No momento en que se presentou a demanda, a 'vella' Pescanova aseguraba que o procedemento formaba parte dunha estratexia procesual que Nova Pescanova puxera en práctica nos meses anteriores co propósito de enfrontar ás dúas sociedades.