A empresa que rebentou a poxa das casetas do San Froilán deixa de pagar

O Concello de Lugo vai rescindir a adxudicación de dúas casetas e dous caldeiros de polbo do San Froilán por falta de pagamentos da empresa que gañou a poxa e que debería xestionar os postos durante catro anos. Con todo, Bruxa Consulting, que poxou por eles máis de 40.000 euros por encima do prezo de saída, non aboou a Lugo o pago deste ano.

O concurso foi polémico porque o prezo prometido pola empresa madrileña deixou fóra os hostaleiros máis tradicionais. O abono deste ano debía facerse en abril, polo que o Concello acordará na súa reunión de mañá declarar extinguidas as autorizacións e quedará coa fianza depositada no seu momento.

O Concello defende que hai tempo para volver adxudicar os postos e que non queden baleiros este 2017, co prexuízo económico que supoñería tamén para as arcas municipais. Desde a oposición, o PP pediu cambiar as bases do concurso para penalizar os posibles incumprimentos, pero o Executivo local rexeita a modificación.