O Dinoseto vigués, motivo de inspiración para o deseño de xoias

Máis dun milleiro de debuxos realizados por escolares ata os 12 anos presentáronse á segunda edición do concurso infantil 'Dinoseto Xoia', que organiza a Escola Técnica de Xoiería do Atlántico en colaboración coa Asociación de Xoiería, Reloxería e Pratería de Pontevedra, coa intención de que os alumnos deseñen xoias inspiradas no popular Dinoseto vigués.

Así, o obxectivo do certame é o de fomentar a creatividade e o desenvolvemento de actividades culturais entre os nenos de infantil e primaria dos colexios da provincia, que mostraron a través dos seus debuxos a súa particular visión do Dinoseto.

O xurado reuniuse na tarde do venres para seleccionar os finalistas e gañadores do concurso, cuxos premios consistirán nunha réplica realizada en prata dos debuxos escolares. Os seus nomes revelaranse durante a entrega de diplomas e xoias, o próximo 16 de maio.

Unha porcentaxe "moi elevada" de participantes no concurso foron alumnos de centros escolares vigueses, aínda que tamén houbo representación doutros colexios e institutos da provincia, como Bueu, Ponteareas, Mondariz ou Baiona.

Os escolares fixeron as súas propostas para a realización de colares, colgantes, chaveiros, pendentes, pulseiras e aneis co Dinoseto como inspiración e os integrantes do xurado tiveron en conta para tomar a súa decisión a creatividade, a calidade do deseño e a adecuación do mesmo á temática proposta

Finalmente, elixíronse preto dun cento de finalistas e, de aí, seleccionouse os doce gañadores do concurso, tres por cada unha das catro categorías.