Ambiente de excepción para unha noite que se esperaba con ganas en Vigo

|

Celtagrada


Balaídos vive este xoves un ambiente extraordinario, con todas as entradas vendidas para o histórico partido de ida de semifinais da Europa League ante o Manchester United. O RC Celta puxo ademais en marcha para este encontro diversas iniciativas no estadio co obxectivo de xerar unha atmosfera acorde coa importancia do choque.


O club repartirá nas portas de acceso do estadio, de maneira gratuíta e ata final de existencias, miles de bufandas conmemorativas da eliminatoria cos escudos e nomes dos dous equipos en liza.


Haberá ademais diversos canóns de confeti situados nos fondos, que se activarán no momento no que os xogadores accedan ao terreo de xogo creando un efecto espectacular.


O club insta os afeccionados a que acudan con tempo ao estadio non só polos controis de seguridade propios dun partido de alto risco, senón tamén para poder participar nestas iniciativas e arroupar o equipo o máximo posible.


DISPOSITIVO DE SEGURIDADE


Na rúa tamén se vive un ambiente de noite histórica. Máis de 400 efectivos da Policía Nacional e da Policía Local de Vigo, en diferentes quendas, velarán pola seguridade nas rúas da cidade, nun dispositivo especial. Entre eles estarán "ao completo" as Unidades de Intervención Policial (UIP) de Vigo e A Coruña, ademais da Unidade de Prevención e Reacción (UPR) da cidade olívica.


Ademais do dispositivo policial, o Concello tomou medidas en previsión da chegada destes afeccionados. Así, autorizou a 13 locais do Casco Vello a instalar barras no exterior dos establecementos, onde se servirán as bebidas en vasos de plástico, e instalaranse 20 baños públicos portátiles en diferentes puntos do barrio histórico.


O dispositivo de seguridade xa tivo que actuar onte á noite, poñendo fin a unha agresión a un seareiro do Manchester United, desprazado na cidade olívica. Un vehículo policial que se atopaba nas proximidades "interviu ao momento e evitou que as cousas fosen a maiores".

relacionada Os policías do Celta-Manchester quéixanse pola falta de "medidas de protección" para os axentes
relacionada O Athletic alonga a mala serie do Celta cunha goleada
relacionada Balaídos recibirá o Manchester United sen un asento libre

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress