Unha liña de axudas para actualizar as prazas de abastos galegas

Mentoring, visual merchandising ou venda online son conceptos que se poderían incorporar moi pronto ás tradicionais prazas de abastos galegas. A Xunta acaba de lanzar un plan de axudas dotado con 900.000 euros destinados a impulsar a competitividade e a calidade das prazas de abastos galegas a través da súa actualización e adecuación aos novos tempos e novos consumidores. 

A convocatoria de axudas que se publicará a próxima semana no DOG. A iniciativa pretende impulsar a excelencia dos mercados e a posta en marcha de novos servizos para os clientes, da que se poden beneficiar tanto os concellos como as asociacións e cooperativas de placeiros.

O prazo de presentación de solicitudes, tal e como indicou a Xunta nun comunicado, será dun mes para partir do día seguinte á publicación da convocatoria.

Por unha banda, os concellos poden obter axudas de ata 60.000 euros e un 70% do investimento, dependendo do estado do mercado, para a realización de melloras nas instalacións das prazas de abastos e a posta en marcha de novos servizos para os clientes.

PRAZAS DO SÉCULO XXI

Entre as actuacións apoiadas atópanse, ademais do acondicionamento do edificio, a posta en marcha de novos sistemas de comercialización en liña, e aspectos relacionados coa loxística e a presentación do produto.

Os municipios tamén poden solicitar axudas de ata 20.000 euros e o 50% do investimento para realizar para a adecuación dos espazos onde se celebran os mercados tradicionais e ambulantes, referentes na venda dos produtos locais e tradicionais de calidade.

Como novidade, este ano as asociacións e cooperativas de placeiros poderán solicitar tamén axudas para a adecuación das instalacións, e melloras no interiorismo e imaxe, a exposición do produto ou os sistemas de comercialización. Neste caso, as axudas poderán chegar ata os 40.000 euros e alcanzarán o 50% do investimento.

No caso das asociacións e cooperativas situadas en concellos polos que pasa o Camiño de Santiago poderán, un ano máis, solicitar os apoios para a creación de lotes de produtos con empaquetado específico no marco da iniciativa Mercados no Camiño, que busca así aproveitar as sinerxias entre turismo e comercio nas localidades polas que discorren as rutas xacobeas.

Estas actuacións apoiadas pola Consellería de Economía, Emprego e Industria irán acompañadas da realización de iniciativas dirixidas ao mentoring comercial para os placeiros, co obxectivo de aumentar a rendibilidade do punto de venda mediante técnicas de visual merchandising, a colocación do produto ou a atención ao cliente.