Abel Caballero confía en que Díaz gañe "con folgura" as primarias do PSOE

O presidente da FEMP e alcalde de Vigo, o socialista Abel Caballero, dixo este mércores que confía en que a presidenta de Andalucía e aspirante á Secretaría Xeral do PSOE, Susana Díaz, gañe "con folgura" as primarias socialistas o próximo 21 de maio.

"Creo que vai gañar por máis do 50 por cento", augurou o socialista no foro 'A España necesaria", organizado por Unidade Editorial.

Ao seu xuízo, Díaz "vai saber administrar moi ben esa vitoria" porque ten unha "enorme capacidade de coordinación", lonxe da "excesiva confrontación" que, ao seu entender, está a demostrar o  ex secretario xeral e candidato á reelección, Pedro Sánchez.

Así mesmo, Caballero aseverou que Sánchez "non ve a realidade" cando di que o PSOE pasará a ser terceira forza política se Díaz gaña e lembroulle que a presidenta andaluza gañou as autonómicas con 20 puntos por encima de Podemos, mentres que el perdeu dúas eleccións xerais.

Á pregunta de se é compatible ser presidenta de Andalucía e secretaria xeral do PSOE, Caballero mostrouse tallante: "Se algo é incompatible é perder eleccións e ser secretario xeral do PSOE. O normal é que o partido o lidere xente que gañe eleccións".

"TEMOS QUE ASPIRAR A SER UNHA FORZA HEXEMÓNICA"

Caballero defendeu as "bases históricas" do PSOE como o alicerce para "aspirar a ser unha forza política hexemónica". Ao seu modo de ver, hai "amarres suficientes e áncoras potentes para manter o barco onde ten que estar", aínda que "algúns decidan saltar pola borda", dixo.

Doutra banda, con respecto ás declaracións dalgúns dirixentes socialistas nas que definen a Díaz como "vella garda", o alcalde de Vigo manifestou que son "banalidades". E engadiu que tanto PP como Podemos estarían "encantados" que gañase Pedro Sánchez.