Sergio: "Temos que preparar o partido coma se perdéramos"

O Celta xógase este xoves o pase a semifinais da Europa Leagua ante o Genk, coa vantaxe do 3-2 sacado en Balaídos. Con todo, Sergio Álvarez sostén que "nesta eliminatoria segue sen haber un favorito, a pesar do resultado que temos na casa".

O gardameta celeste argumenta que "eles cun gol pasarían a eliminatoria", polo que insiste en que este partido "hai que preparalo igual que se empatásemos ou perdésemos, sabendo que temos que ser nós mesmos e que non nos podemos confiar".

Animicamente ve o equipo reforzado tras a vitoria da fin de semana e cre que "era importante volver gañar en Liga para seguir pelexando polo que queremos". Para a pelexa do xoves "o equipo está preparado para estes partidos e temos moitas ganas e ilusión", sentenza.

Sobre o rival, defíneo coma "un equipo que lle gusta atacar e teno que facer", así que o gardameta insiste en "tentar que non xeren moitas ocasións" e que "cando estean preto da área, hai que estar cada un coa súa marca para que non se repitan os erros do partido de ida".

Con esta base, Sergio agarda "que sexa un partido con moitos goles, pero ao noso favor".