Ana Pontón: "O nivel de deixamento de Feijóo con Galicia non ten precedentes"

A portavoz nacional do BNG, Ana Pontón, asegurou que o BNG está "en disposición de ser opción maioritaria" e de "disputarlle o Goberno da Xunta ao PP en catro anos". Por iso, fixo fincapé na necesidade de "traballar" para "chegar en boa forma" ás próximas eleccións autonómicas previstas para 2020.

En concreto, a portavoz nacional do Bloque pronunciouse deste xeito nunha entrevista en RNE recollida por Europa Press, na que agradeceu á militancia o seu apoio tras ser reelixida portavoz nacional o pasado domingo co 98 por cento dos votos.

"Demos un exemplo de cohesión, unidade e fortaleza", defendeu a tamén portavoz parlamentaria, quen considera que esta asemblea supuxo o "punto e final" a un ano de "debate intenso". Ademais, sobre a substitución xeracional tanto do Consello como da Executiva Nacional, explicou que é necesario "ir incorporando novas persoas" pero "sen desaproveitar a bagaxe do Bloque", como é o caso do ex portavoz parlamentario Francisco Jorquera.

Así mesmo, fixo fincapé en que o seu partido ten as "portas abertas" a que "máis persoas" se incorporen ao proxecto nacionalista, pois existen, aseverou, "diferentes maneiras de entender e sentir o país".

A continuación, condenou a "emigración xuvenil" e a "deterioración" das condicións laborais. E é que sostén que o Goberno galego está "entregado a Rajoy", cousa que ve patente co "desmantelamento do FEVE" e o "atraso ano tras ano da chegada do AVE".

VENCE DIRIXIU O BNG NUN MOMENTO "COMPLICADO"

Preguntada sobre o ex portavoz nacional do BNG Xavier Vence, quen abandonou o partido recentemente, fixo fincapé en que este, a quen respecta e estima, tivo que dirixir a organización frontista nun momento "complicado".

"Este país necesita unha alternativa nacionalista para progresar", afirmou, para logo defender que se utilice a enerxía para "desenvolver" Galicia en lugar de "seguir engordando os beneficios de Gas Natural Fenosa". "Feijóo demoniza este tipo de propostas. [...] Igual aspira a acabar no Consello de administración dalgunha eléctrica como Aznar", ironizou.

Cuestionada pola situación do PSdeG, remarcou que "as divisións non é algo que lle pasa só ao PSOE, senón tamén ao PP". É máis, para argumentar a afirmación puxo como exemplo determinados procesos provinciais e locais, como puido ser o caso da pugna polo liderado do PP vigués entre Elena Muñoz e Javier Guerra, que gañou a primeira.

FEIJÓO E O SEU "DEIXAMENTO CON GALICIA"

Por último, preguntada sobre as diferenzas entre Fraga e Feijóo, considera que o primeiro "representou outra cara do PP": "Non penso que fose un bo presidente para Galicia, máis ben todo o contrario. [...] O nivel de deixamento de Feijóo con Galicia non ten precedentes".

No que respecta ás próximas eleccións autonómicas, e cuestionada directamente sobre se volverá ser candidata, indicou que iso o decidirá a militancia. "Eu estou sempre ao servizo do Bloque e de Galicia. [...] Teño toda a disposición", resolveu.