A Xunta duplica as axudas para vítimas de violencia machista

O presidente da Xunta, Alberto Núñez Feijóo, anunciou que o Executivo duplicará o importe reservado nas arcas da comunidade para axudas periódicas para mulleres vítimas de violencia machista, ata superar os 4 millóns de euros.

"Buscamos garantir a independencia económica das vítimas, o primeiro paso para cortar co agresor e tentar unha nova vida", asegurou Feijóo, quen explicou que as axudas mensuais sitúanse entre os 300 e os 800 euros ao mes durante un período máximo dun ano, en función das condicións familiares da beneficiaria.

Ao termo da reunión semanal do Executivo, o presidente subliñou, ademais, que Galicia é "a primeira comunidade" en incluír nestas axudas a mulleres vítimas de trata. Aludiu tamén ás medidas pactadas no Parlamento, antes de garantir que o seu Goberno actuará na liña do acordado sen romper "a unidade".

De feito, destacou que, en base aos acordos parlamentarios, esta orde de axudas estará aberta todo o ano, de forma que as vítimas poderán solicitalas en calquera momento.

Feijóo concretou que no último ano beneficiáronse desta axuda 324 mulleres. Ademais, repasou outras medidas impulsadas pola Xunta en ámbitos como o educativo, o da atención psicolóxica ou o xudicial, "garantindo servizo xurídico ás vítimas 24 horas e 365 días ao ano".