O home acusado de abusar sexualmente das súas dúas fillas en Redondela evita o cárcere

A Sección Quinta da Audiencia Provincial de Pontevedra, con sede en Vigo, condenou a un pai acusado de abusar sexualmente das súas dúas fillas menores de idade a unha pena de dous anos de prisión, que eludirá ao acordarse a suspensión da condena a condición de que pague unha indemnización de 3.000 euros ás vítimas e que non volva delinquir.

O xuízo por estes feitos estaba previsto para a mañá deste martes, pero non se celebrou ao chegar todas as partes a un acordo de conformidade. Así, o home aceptou dous anos de prisión, co que rebaixa a pena de seis anos que pedía inicialmente a Fiscalía para el.

Pola súa banda, tamén estaba previsto que se axuizase este martes á nai das menores, sobre a que a Fiscalía considera que coñecía e consentía os abusos.

Con todo, a muller non compareceu no xulgado na cidade olívica e decretouse unha orde de procura, captura e ingreso en prisión contra ela.

ABUSOS SEXUAIS CONTINUADOS

Segundo o escrito de acusación pública, os abusos producíronse entre 2008 e 2011 no domicilio familiar situado no partido xudicial de Redondela (Pontevedra), tanto cando o pai convivía coa familia, como despois, durante o réxime de visitas tras o divorcio da parella.

A Fiscalía sostén que, mentres que o pai se metía na cama coas nenas, lles facía tocamentos e fregaba o seu corpo co delas, a nai coñecía e consentía a situación. Mesmo "facilitaba os feitos ausentándose durante longas tempadas do domicilio familiar, deixando ás fillas a soas co pai, e consentindo que as menores durmisen con el na mesma cama".

A Xunta declarou, en abril de 2012, o desamparo das nenas e, posteriormente, declaráronse medidas cautelares de índole penal que prohiben aos acusados aproximarse ou comunicarse coas súas fillas.