Os gandeiros galegos volven cobrar máis de 30 céntimos por litro de leite

O prezo do leite que se paga de media a gandeiros en Galicia subiu en xaneiro ata os 30,3 céntimos o litro --desde os 29,8 céntimos do mes de decembro de 2016--, segundo os datos feitos públicos este luns polo Ministerio de Agricultura.

Deste xeito, os produtores galegos volven cobrar o seu leite por encima dos 30 céntimos o litro, situación que non se producía desde hai case dous anos. En concreto, desde o último mes da existencia de cotas lácteas, en marzo de 2015.

Con todo, Galicia segue sendo a comunidade na que os seus gandeiros cobran menos polo leite, xa que en todas as autonomías peninsulares se pagan máis de 31 céntimos por litro (a media está en 31,6 céntimos).

Así, Galicia segue lonxe dos 34,9 céntimos que se paga en xaneiro deste ano aos produtores vascos, así como dos 34,2 céntimos da Rioxa, as comunidades con prezos máis elevados.

En xullo de 2016 alcanzouse o prezo máis baixo do leite en Galicia desde maio de 2009, con 26,7 céntimos, e desde entón incrementouse ata superar os 30 céntimos.

AS EXPLOTACIÓNS SEGUEN Á BAIXA

Pola súa banda, o número de explotacións lácteas seguen á baixa en Galicia ata un total de 8.475 en xaneiro, o que supón 603 menos que os 9.078 gandeiros con entregas de xaneiro de 2016.

No tocante á produción, Galicia produciu en 2016 un total de 218.873 toneladas de leite, de forma que se incrementa fronte ás 214.626 do mes anterior (+2%).