O Parlamento de Galicia forma a 'cardio anxos' ao ritmo da 'Macarena'

Formar novos 'cardio anxos' e ampliar a rede de voluntarios preparada para actuar ante un caso de morte súbita e manexar un desfibrilador é o obxectivo da xornada organizada polo Parlamento de Galicia, que tamén aspira a que a reanimación se ensine nos centros educativos, seguindo o camiño emprendido en países nórdicos con "resultados espectaculares".

Deputados, persoal do Pazo do Hórreo e xornalistas que habitualmente cobren información parlamentaria participaron este luns na xornada de reanimación cardiopulmonar e manexo de desfibrilador externo semitaumático, que se reeditará o venres dado o éxito da convocatoria organizada polo Parlamento e coordinada polo cardiólogo José Ramón González-Juanatey.

"Parecíanos oportuno enviar unha mensaxe desde o Parlamento e queremos pedir a colaboración das Consellerías de Educación e Sanidade para estender a formación entre a poboación máis nova", trasladou o xefe do Lexislativo, Miguel Santalices. Tras el tomou a palabra o responsable da carteira sanitaria da Xunta, Jesús Vázquez Almuíña, quen remarcou que xa hai iniciativas en marcha promovidas polo 061 e a área educativa.

De feito, puxo como exemplo o caso de unha nena formada en reanimación que, tras avisar ao 061 e seguindo as indicacións do persoal de emerxencias, foi capaz de salvar á súa avoa. Nunha breve charla previa ao arranque formal do curso, o doutor Juanatey exemplificou co éxito de iniciativas de formación en Suecia e Piacenza (Italia).

En España, apuntou que morren de forma súbita ao ano, debido a afeccións como os infartos, unhas 40.000 persoas --entre 3.000 e 3.500 en Galicia-- e manifestou a súa convicción de que, con cursos de formación, a supervivencia podería elevarse un mínimo do 5 ao 15 por cento. Nos países nórdicos, a taxa é de entre o 20 e o 30 por cento.

Juanatey aproveitou o transcurso da xornada, coa que o Parlamento e a Sociedade Española de Cardiología buscan concienciar, para pedir máis desfibriladores accesibles e subliñar o beneficioso que sería aprender a reanimar, por exemplo, en centros educativos ou ao sacar o carné de conducir.

COMPRESIÓNS A RITMO DE 'MACARENA'

O curso en si contou cunha parte teórica, na que unha cardióloga explicou os pasos para dar nun suposto de reanimación: comprobar e facer seguro a contorna, comprobar se a persoa en parada responde ou non respira, chamar a emerxencias e iniciar as compresións torácicas, mentres --se é posible-- se pide a alguén que tente localizar e desfibrilador.

O obxectivo é realizar unhas 100 ou 120 compresións por minuto, aínda que os expertos, para que os alumnos dos cursos de reanimación fixen a idea, lembran que a idea é seguir o ritmo da coñecida canción 'A Macarena' mentres se realizan as presións externas da manobra de RCP.

UNHA XORNADA CON ANÉCDOTAS

Na xornada parlamentaria non faltaron as anécdotas e o primeiro en demostrar as súas habilidades foi o xefe do Lexislativo, Miguel Santalices, que conseguiu revivir ao seu 'paciente', un maniquí de goma.

Tamén o conseguiu o portavoz parlamentario do PSdeG, Xoaquín Fernández Leiceaga, co que houbo quen chanceou e instou a imaxinar que o seu 'paciente' era Pedro Sánchez.

Outros deputados participaron na xornada, como tamén persoal da Cámara e xornalistas, con diferentes graos de éxito cos seus respectivos 'pacientes'.

En todo caso, os organizadores subliñaron que o importante é "actuar" e partir da base de que, cando unha persoa se enfronta a unha morte súbita, o "peor" que se pode facer é "non facer nada".